ArmDaily.am-ի հետ զրույցում «Հայրենիք» կուսակցության խոսնակ Սոս Հակոբյանն ասաց, որ Օնիկ Գասպարյանի վերաբերյալ դատարանի որոշումը օրինականության հաստատում էր:
«Օրինականության հաստատման առումով դատարանն ընդամենը կիրառել է հայցի ապահովման միջոց, այսինքն կասեցրել է իրավունքի ուժով հրամանի մտնելու փաստը, որպեսզի մինչև գործն ըստ էության լուծվի, չխախտվեն Օնիկ Գասպարյանի հնարավոր իրավունքները: Այդ իմաստով շատ կարևոր է, որ նման ցանկացած վեճ լուծում ստանա դատարանում»,-ասաց Հակոբյանը:
Նա նշեց, որ նախագահը հնարավորություն ուներ լուծում տալ այս հարցին, բայց նա դա չարեց՝ թողնելով բախտի քմահաճույքին այս հարցի լուծումը: Հիմա վարչական դատարանը իր վրա է վերցրել այս հարցի լուծումը, ըստ էության, քանի որ կա դիմում և համապատասխան հայց:
Նա նշում է, որ ողջունելի է, որ դատարանները և իրավունքի գերակայությունը աշխատում են Հայաստանում և շատ կրիզիսային հարցեր հարթվելու ճանապարհներին: Ինչ վերաբերում է «Բարգավաճ Հայաստան» խմբակցության ղեկավարի հետ հանդիպումից հետո հունիսի 20-ին Փաշինյանի կողմից արտահերթ ընտրություններ անցկացնելու որոշմանը, Սոս Հակոբյանը նշում է, որ նորություն չէր, որ ԲՀԿ-ն մասնակցելու է ընտրություններին։
Նա ասաց, որ երբ փաստ դառնան արտահերթ ընտրությունները, Նիկոլ Փաշինյանը երկու անգամ վարչապետ չընտրվի և արդեն իրավունքի ուժով ցրվի՝ «Հայրենիք» կուսակցությունը մասնակցելու է հաղթանակ տանելու համար՝ վերջապես այս երկրում կայունություն հաստատելու համար:
«Հայրենիքի փրկության շարժման» ՀՅԴ ներկայացուցիչ Գեղամ Մանուկյանը մեզ հետ զրույցում ասաց, որ Օնիկ Գասպարյանի որոշումը կայացնելիս դատարանը գործել է օրենքի շրջանակներում՝ դա ոչ փառաբանման է ենթակա, պարզապես դատարանը գործել է իրավասությունների շրջանակներում: Ինչ վերաբերում է Նիկոլ Փաշինյանի կողմից արտահերթ ընտրություններ անցկացնելուն, ապա նա նշեց, որ դրա վերաբերյալ հանդես կգան առանձին հայտարարությամբ:
