Առցանց հարթակում երեկ տարածվեցին ՏԻՄ մարմինների պաշտոնյաների հետ հեռախոսային խոսակցության ձայնագրություններ, որոնցում պաշտոնյային զանգահարած անձը ներկայանում է իբրեւ «Քաղաքացիական պայմանագիր» կուսակցության անդամ ու հետաքրքրվում, թե վարչապետ Նիկոլ Փաշինյանի՝ մարտի մեկին հայտարարած հանրահավաքին մասնակցելու համար մարդկանց տեղափոխման խնդիր կա՞, տրանսպորտի հարց պե՞տք է լուծել։ Զրուցակիցներն էլ պատասխանում են, թե ինչ են արել այդ ուղղությամբ։ Ձայնագրություններն արագորեն տարածվեցին համացանցում և ԶԼՄ-ներում, հերթական անգամ փաստելով, որ իշխանության բազմամարդ հանրահավաքները պարզապես վարչական ռեսուրսի չարաշահմամբ է իրականացվում։ Այս խայտառակ պատկերից հետո իշխանական մանր ու միջին տրամաչափի չինովնիկները փորձում են էժանագին «կռուտիտներ» անել, հայտարարելով, թե վստահություն չունեն, որ դրանք իրական են։ Օրինակ նման միտք է արտահայտել ԱԺ «Իմ քայլը» խմբակցության պատգամավոր Հայկ Սարգսյանը՝ Շիշ բռնողը։ Լրագրողների հետ զրույցում նա ասել է, որ որևէ վստահություն չկա, որ դրանք իրական են: Մինչդեռ՝ հեռախոսազանգերին պատասխանողները չեն հերքել այդ հանգամանքը։ Օրինակ ձայնագրություններից մեկում Շիրակի մարզի Մեղրաշեն համայքի ղեկավար Հունան Պողոսյանն է։ Վերջինս ֆեյսբուքյան գրառում է արել։ «Հարգելի հայրենակիցներ, ուզում եմ կարճ անդրադառնալ երեկ համացանցում տարածված հեռախոսազանգին: Իմ աշխատանքային գործունեության ընթացքում ես միշտ առաջնորդվել եմ ժողովրդի շահով և մեր երկրի բարօրությամբ: Այս պահին էլ ինձ համար առաջնայինը դա է: Ովքեր ինձ ճանաչում են, գիտեն իմ անցած ուղին և իմ կատարած աշխատանքները: Հորդոր-խնդրանք բոլորիդ` զերծ մնացեք անհիմն հերյուրանքներին և մեղադրանքներին հավատալուց, Մեղրաշեն համայնքի ազգաբնակչությունը միշտ էլ ազատ է եղել իր ընտրության, ազատ կամքի դրսևորման հարցում: Խաղաղություն և բարօրություն մեր երկրին: Մեղրաշեն համայնքի ղեկավար` Հունան Պետրոսյան»: Գյուղապետը չի հերքել, որ հենց ինքն է խոսել։ Մեկ այլ ձայնագրությունում էլ Էջմիածնի փոխքաղաքապետն է՝ Արսեն Պետրոսյանը։ Վերջինս ԶԼՄ-ներից մեկին տված հարցազրույցում ասել է, թե քանի որ զանգահարողը իրենց կուսակցությունից է ներկայացնել, խոսակցությունը տնավարի է ստացվել։ Միաժամանակ Պետրոսյանը հայտարարել է, թե հանցավոր բան տեղի չի ունեցել։ Թե արդյո՞ք հանցանք կա կատարվածում, պետք է պարզեն իրավապահ մարմինները։ Ինչ վերաբերում է իշխանականների հերքումներին, ապա այս դեպքում լավ կլինի լռեն, գոնե կխուսափեն հերթական անգամ ծիծաղելի իրավիճակում հայտնվելուց։ Չնայած, դժվար թե դա իրենց մտահոգի։ Irakanum.am