ԱԺ օրակարգում շուրջ 50 հարց է ընդգրկված, սակայն հետպատերազմյան հայաստանյան խորհրդարանում տրամաբանական հարց է առաջանում, թե այս գերհագեցած օրակարգի հարցերից որն է, որ արտացոլում է այն խնդիրները, որոնք այսօր ծառացած են մեր հասարակության և պետության առջև։ Այս մասին ԱԺ նիստին հայտարարեց «Բարգավաճ Հայաստան» խմբակցության պատգամավոր Իվետա Տոնոյանը։ «Կա՞ արդյոք հարց, որը վերաբերում է Արցախից Հայաստան պարտադրանքով եկած հայրենակիցների խնդիրներին, հարց, որ վերաբերում է ռազմագերիների վերադարձին, անհետ կորածների ճակատագրին, Սյունիքի անվտանգությանը․ ո՛չ, չկա։ Որևէ հարց չկա ներառված այս օրակարգում, որը կարող է այս կամ այն չափով թոթափել մեր երկրի առջև ծառացած խնդիրները։ Նույն տրամաբանությամբ, ասենք, տիեզերագնացության զարգացման կամ ռնգեղջյուրների պոպուլյացիային վերաբերող օրենսդրական նախաձեռնություն թող բերեր Կառավարությունը»,-ասաց պատգամավորը, ապա դիմեց իշխանական խմբակցությանը․ «Դուք հասկանու՞մ եք, որ այս Կառավարությունը՝ իր ղեկավարի գլխավորությամբ, այլևս սպառել է իրեն տրված լեգիտիմությունը, այլևս չունի որևէ օրակարգ, որով կարող է գալ ԱԺ և ներկայացնել հասարակությանն ու նրա շահերը։ Եթե այս ամենը չի հասկանում իշխանությունը և խորհրդարանական մեծամասնությունը, ապա դա իրոք ողբերգություն է»,-ասաց նա ու հորդորեց գնալ Սյունիք՝ տեսնելու իրականությունը․ «Հարգելի գործընկերներ, գնացեք Սյունիքի մարզ ու տեսեք, թե ինչ վտանգների տակ են ապրում մեր հայրենակիցները, ապրում են ադրբեջանցի զինվորների նշանառության տակ, ադրբեջանցիները Գորիս-Կապան ճանապարհի հայ վարորդներին վիզը կտրելու նշաններ են ցույց տալիս։ Գնացեք, շփվեք բնակչության հետ ու կտեսնեք իրականությունը, ոչ թե կառավարության ստեղծած «ֆեյք» ֆեյսբուքյան իրականությունը»,-ասաց Իվետա Տոնոյանը։ Մանրամասները՝ տեսանյութում։