Ազգային ժողովը քննարկում է Հաշվեքննիչ պալատի անդամի ընտրության հարցը: ԱԺ նախագահ Արարատ Միրզոյանը հայտնեց, որ ԱԺ ֆինանսավարկային և բյուջետային հարցերով մշտական հանձնաժողովը Հաշվեքննիչ պալատի անդամի պաշտոնի համար ԱԺ-ին է առաջարկում Կարեն Առուստամյանի թեկնածությունը:
Թեկնածուին ներկայացրեց Ֆինանսավարկային և բյուջետային հարցերով մշտական հանձնաժողովի նախագահի տեղակալ Արտակ Մանուկյանը, ապա նա հանդես եկավ ելույթով և ներկայացրեց իր տեսլականը:
ԱԺ նախագահը նշեց, որ բացի Հաշվեքննիչ պալատի անդամի ընտրությունից, ԱԺ-ն ևս երկու ընտրության հարց պետք է քննարկի՝ Կենտրոնական բանկի խորհրդի անդամի ընտրության և ԱԺ տարածքային կառավարման, գյուղատնտեսության ու բնապահպանության հարցրեի մշտական հանձնաժողովի նախագահի ընտրության հարցերը:
Նա հավելեց, որ եթե այս երեք հարցերը քննարկեն, ընտրությունը կատարեն և քվեարկությունն ամփոփեն այսօր, ապա նաև կքվեարկեն մինչ այս պահը քննարկված նախագծերը։
