Ռուսաստանում Մերձավոր Արևելքի և Կենտրոնական Ասիայի ուսումնասիրության կենտրոնի տնօրեն Սեմյոն Բաղդասարովը Свободная Пресса-ի հետ զրույցում մեկնաբանել է դեկտեմբերի 10-ին Բաքվում սպասվող ռազմական շքերթը, որին մասնակցելու է նաև Թուրքիայի նախագահ Ռեջեփ Թայիփ Էրդողանը, որը վերջին արցախյան պատերազմի ժամանակ օգնություն է ցուցաբերել Ադրբեջանին: Բացի այդ Բաղդասարովը մեկնաբանել է Արցախում և Հայաստանում ստեղծված ընդհանուր իրավիճակը: «Ղարաբաղում կրած պարտության մեղքը հիմնականում ընկած է Հայաստանի ղեկավարության վրա: Չեմ զարմանա, եթե իմանանք, որ դա արվել է դիտավորյալ, և Փաշինյանն ու իր թիմը պարզապես վաճառել են այս տարածքը որոշակի գումարով: Նրանք չեն արել այն, ինչ պետք է անեին մարտերի ընթացքում: Ուստի, Ռուսաստանի համար անիմաստ էր միանշանակ աջակցություն ցուցաբերելը: Առանց այն էլ որոշակի ռազմատեխնիկական օգնություն տրամադրվում էր»,-ասել է Բաղդասարովը: Նա ընդգծել է, որ հակամարտության գոտի ռուսական խաղաղապահ ուժերի ներդրումը ճիշտ քայլ է: Այլ բան է, որ առանց որոշակիորեն վիճարկելու Ադրբեջանի գործողությունները, որը ցանկանում էր վերականգնել իր տարածքային ամբողջականությունը, Մոսկվան պետք է խստորեն պահանջեր իր տարածքից դուրս բերել թուրքական ուժերը և թուրքամետ ահաբեկչական խմբավորումները: «Շատ հաճախ մենք համաձայնում ենք  մարտավարական վնաս կրել ՝ փոքր ռազմավարական շահի ակնկալիքով»,-նկատել է Բաղդասարովը: Մեկնաբանելով Թուրքիայի նախագահի մասնակցությունը Բաքվում կայանալիք ռազմական շքերթին, քաղաքագետը նշել է. «Պետք է հասկանալ, որ Էրդողանը գնում է Բաքու՝ որպես իր գաղութ: Նա Ադրբեջանը վերջնականապես կցել է իրեն: Ալիևը իր ինքնիշխանությամբ է վճարել Ղարաբաղի համար (կարծում եմ ՝ ժամանակավորապես)»,-ավելացրել է Բաղդասարովը: Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։