Ստեփանակերտն ավելի կոշտ հայտարարություն է ակնկալում Մոսկվայից` հակամարտությանը երրորդ երկրների մասնակցության անընդունելիության վերաբերյալ: «Տավուշի դեպքերից հետո Ռուսաստանի Դաշնությունը հայտարարությամբ հանդես եկավ, որում կոչ արեց երրորդ կողմերին չխառնվել հակամարտությանը: Այս դեպքում Արցախի դեմ ագրեսիայից հետո նման հայտարարություն չկա: Չնայած Թուրքիայի մասնակցությունն ավելի ակնհայտ է: Կա եւ քաղաքական, եւ տեխնիկական աջակցություն, եղել են զորավարժություններ, թուրքական տեխնիկայի մի մասը մնացել է Ադրբեջանի տարածքում: Կարելի է ակնկալել եւ մենք հույս ունենք, որ կլինեն հայտարարություններ, որոնք նման կլինեն Պետդեպարտամենտի կողմից ընդունված եւ Նիդեռլանդների խորհրդարանի կողմից նախապատրաստված հայտարարություններին: Հուսով ենք, որ միտումը կշարունակվի»,- ասել է Մասիս Մայիլյանը: