Իտալիայում իշխանություններն աստիճանաբար թուլացնում են կորոնավիրուսային համավարակով պայմանավորված սահմանափակումները: Դրանք հիմնականում վերաբերում են մարտի 22-ին կասեցված արտադրական և շինարարական գործունեությանը, հայտնում է ՏԱՍՍ գործակալությունը։ Ընդհանուր առմամբ, աշխատանքի է վերադառնում  4,5 մլն մարդ: Վերսկսվում է հանրային տրանսպորտի աշխատանքը: Միևնույն ժամանակ շարունակում են փակ մնալ ռեստորանները, բարերը, առևտրի կենտրոնները, մարզասրահները, լողավազանները, վարսահարդարման և գեղեցկության սրահները։ Չեն բացվում նաև ուսումնական հաստատությունները, մանկապարտեզները։ Դպրոցականներն ու շրջանավարտները քննություններ կհանձնեն առցանց։ Եկեղեցիներում վերսկսվում են սգո արարողությունները, սակայն դրանց կարող է մասնակցել 15-ից ոչ ավել մարդ։ Թույլատրվում է այցելել նույն բնակության վայրում ապրող մերձավոր ազգականներին և մշտական գործընկերներին։ Իշխանությունները ծրագրում են մշտադիտարկում անցկացնել և տեսնել՝ ինչպես թուլացումները կազդեն վարակման դինամիկայի վրա։ Եթե երկրում վարակի կտրուկ պոռթկում չլինի, ապա մայիսի 18-ին իտալացիներին սպասում է թուլացումների հաջորդ փուլը՝ կբացվեն խանութներն ու թանգարանները, իսկ հունիսի 1-ին՝ ռեստորաններն ու վարսավիրանոցները։ Միաժամանակ կառավարությունը մտածում է ներքին զբոսաշրջության կազմակերպման հնարավորության մասին՝ հաշվի առնելով, որ մինչև տարեվերջ արտասահմանցի զբոսաշրջիկների վերադարձը գրեթե անհնար է։ Վերջն տվալներով՝ Իտալիայում հաստատվել է կորոնավիրուսի 210 717 դեպք, որոնցից 28 884-ը՝ մահվան ելքով։