ArmDaily.am -ի տեղեկություներով՝ կառավարությունը մտադիր է երկարացնել արտակարգ դրության ժամկետը ևս 30 օրով, սակայն թե երբ նախագիծը կներկայացնեն քննարկման, դեռևս հայտնի չէ: Ընդ որում՝ երկար բանավեճը արտակարգ դրություն երկարացնել-չերկարացնելու մասով հանգուցալուծվել է նման որոշմամբ, քանի որ Արսեն Թորոսյանին հաջողվել է ապացուցել, որ արտակարգ դրությունը արդյունավետ է վիրուսի տարածումը հսկելու, կանխարգելելու տեսանկյունից։ Մեզ հայտնի դարձավ նաեւ, որ չնայած Փաշինյանի վերջին լավատեսական հայտարարություններին՝ խստացումները թուլացնելու, բնականոն կյանք վերադառնալու մասով, այնուհանդերձ, մինչեւ ապրիլի 12-ը գործող խիստ սահմանափակումների զգալի մասը շարունակելու են պահպանվել։ Այդ սահմանափակումների թուլացումը կարող է լինել փուլ առ փուլ, օրինակ՝ սկզբից թույլ տան շինարարական աշխատանքները, հետո արդյունաբերություն եւ այլն։ Սակայն, ամենամեծ խնդիրը հասարակական տրանսպորտի հարցն է, որի մասով հստակեցում չկա՝ կաշխատի, թե ոչ։ ArmDaily.am-ի հետ զրույցում վարչապետ Նիկոլ Փաշինյանի մամուլի պատասխանատու Մանե Գևորգյանն ասաց. «Այս պահին նման որոշում չկա: Խստացված ռեժիմի ժամկետը լրանում է ապրլի 12-ին, հետագա որոշման մասին պաշտոնապես կտեղեկացնենք»: Նշենք, որ Հայաստանում սահմանված արտակարգ դրությունն ավարտվում է ապրիլի 14-ին, իսկ Աժ հերթական լիագումար նիստը մեկնարկելու է հենց նույն օրը: Սակայն ապրիլի 13-ին նախատեսված է ԱԺ արտահերթ նիստ, որի օրակարգում ընդգրկված են մի շարք օրենքներում փոփոխություններ անելու հարցը։ Այս պահին արտահերթ նիստի օրակարգում արտակարգ դրությունը երկարացնելու մասին նախագիծ չկա։