Ցավոք սրտի գազի գինը հաճախ եղել է քաղաքական շահարկումների և քաղաքական մանիպուլյացիների առարկա: Այս մասին այսօր ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը՝ անդրադառնալով գազի գնի շուրջ բանակցություններին:
«Նախկինում ՀՀ կառավարությունը բազմիցս դա օգտագործել է քաղաքական նկատառումներով՝ հաշվի չառնելով գազային համակարգի զուտ տնտեսական գործունեության անհրաժեշտությունը: Եվ երբ այսօր նման իրավիճակների հետ բախվում ենք, դա նախորդ կառավարությունների վարած անհեռանկար, ոչ տնտեսական քաղաքականության հետևանք է»,-ասաց նա:
Վարչապետը նշեց, որ այսօր գազի համակարգի արդյունավետ շահագործման խնդիրներ ունենք, որոնք պետք է լուծենք: Նա նշեց, որ Հայաստանի փոխվարչապետ Մհեր Գրիգորյանը կառավարության անունից դիմել է «Գազպրոմ» ընկերությանը, որ վերանայենք գազի գինը՝ նվազման ուղղությամբ:
Ինչ վերաբերում է հնարավոր բարձրացմանը, վարչապետն ասաց.«Այսօր ես հեռախոսազրույց եմ ունեցել ՌԴ նախագահ Պուտինի հետ և այդ հարցը քննարկել ենք: Ես ասել եմ, որ հաշվի առնելով այս ճգնաժամային իրավիճակը և՛ հումանիտար, և՛ տնտեսական առումով ես ակնկալում եմ, որ ՌԴ նախագահը կմիջամտի այս պրոցեսին, որ կարողանանք «Գազպրոմ-Արմենիայի» ներկայացրած հայտի հետ կապված որոշումներ կայացնել: Քանի որ հանրության, կառավարության կողմից չի ընկալվում, որ այս ճգնաժամային իրավիճակում կարելի է այսպիսի որոշում կայացնել»,-ասաց նա:
Նա նկատեց, որ մինչ հիմա դոլարով են վճարել և առաջարկել է, որ ճիշտ կլինի ռուբլիով վճարել, քանի որ դա ավելի տրամաբանական է: «Հույս ունենանք, որ այս բանակցությունները հաջող կլինեն»,-ասաց նա:
00:00:00
