Իսպանիայում կորոնավիրուսով վարակվածների թիվը մեկ օրում ավելացել է 2000-ով՝ հասնելով 7753-ի: ТАСС գործակալության փոխանցմամբ՝ այս մասին կիրակի հայտնել է թագավորության առողջապահության նախարարը: Նրա տվյալներով՝ կորոնավիրուսով վարակման առաջին դեպքի հայտնաբերման օրվանից մինչ օրս երկրում հիվանդությունից մահացել է 288 մարդ: Հիվանդների մեծամասնությունը գրանցվել է Մադրիդում՝ 3544 մարդ: Վարակի առաջին դեպքն Իսպանիայում արձանագրվել է հունվարի 31-ին: Վարակակիրների թիվն սկսել է կտրուկ աճել Իտալիայում վիրուսի բռնկման ֆոնին: Շաբաթ թագավորության նախարարների խորհուրդը հաստատել է երկրում բարձր պատրաստականության ռեժիմ սահմանելու որոշումը: Ռեժիմի սահմանումը ենթադրում է երկրի ողջ տարածքում բնակիչների տեղաշարժի սահմանափակումը՝ բացառությամբ խիստ անհրաժեշտության դեպքերի: Ներկա պահին դադարեցվել են դասերը բոլոր ուսումնական հաստատություններում, փակ են ժամանցային կենտրոնները, սրճարաններն ու ռեստորանները: Բարձր պատրաստականության ռեժիմը գործելու է 15 օր, սակայն հետագայում կարող է երակարձգվել:  Ինչպես նշվում է, սահմանափակումները խախտելու համար կարող են ձերբակալել բնակիչներին: