Irakanum.am-ն արդեն տեղեկացրել էր, որ իշխանության վերադասավորման արդյունքում կադրային ու կառուցվածքային լուրջ փոփոխություններ են տեղի ունենալու: Կադրային փոփոխություններ նախատեսված են ինչպես կառավարության կազմում, այնպես էլ մի շարք մարզային իշխանություններում: Մասնավորապես մեր ունեցած տեղեկություններով  պաշտոնանկ են արվելու Սյունիքի, Արմավիրի եւ Տավուշի մարզպետները: Կարեն Կարապետյանը Սյունիքի մարզպետի պաշտոնում տեսնում է բիզնես գործընկերոջը՝ Վահե Հակոբյանին: Վերջինս հիշեցնենք, որ մեկ անգամ եղել է Սյունիքի մարզպետ՝ փոխարինելով հայտնի Սուրիկ Խաչատրյանին: Արմավիրի մարզպետ Աշոտ Ղահրամանյանի գործունեությունից եւս իշխանությունը խիստ դժգոհ է: Irakanum.am-ի տեղեկություններով այս պահին քննարկվում է Արմավիրի մարզպետի երկու հավանական թեկնածուի անուն: Խոսքը ԱԺ պատգամավոր Նահապետ Գեւորգյանի (Նովո)  եւ նախկին պատգամավոր Ալեքսան Պետրոսյանի (ՄԱՊ-ի Ալիկի) մասին է: Նկատենք, որ Արմավիրի մարզում շրջանառվող տեղեկությունների համաձայն մարզպետի պաշտոնին հավակնում է նաեւ Էջմիածնի քաղաքապետ Կարեն Գրիգորյանը, ով ԱԺ ՀՀԿ խմբակցության պատգամավոր Մանվել Գրիգորյանի որդին է: Սակայն իշխանական կուլիսներում նրա թեկնածության հարցն անգամ քննարկման ենթակա չէ, եւ որ նման թեմա չկա: