Բաղրամյան 26-ում այսօր տեղի է ունեցել Սերժ Սարգսյանի և Կարեն Կարապետյանի հանդիպումը: Սարգսյանը Կարապետյանին տեղյակ է պահել, որ ապրիլի 9-ին նրա գլխավորած կառավարությունը հրաժարական է ներկայացնելու: Այնպիսի տպավորություն է, թե Կարապետյանը այդ մասին չգիտեր եւ Բաղրամյան 26 էր գնացել ու առաջին անգամ լսել Սերժ Սարգսյանի շուրթերից: Սարգսյանն էլ առիթից օգտվել ու շնորհակալություն է հայտնել Կարապետյանին լավ աշխատանքի և ընկերության համար: Սերժ Սարգսյանը ցանկություն է հատնել, որ Կարեն Կարապետյանը այդ խոսքերը փոխանցի նաեւ  կառավարության անդամներին: Այսպիսով Սերժ Սարգսյանը Կարեն Կարապետյանին  հեռացրեց վարչապետի պաշտոնից, չսպասելով անգամ ապրիլի 9-ին: Սարգսյան Կարապետյան հանդիպումը ավելի շատ հրաժեշտի է նման: Երկու օր անց  Սերժ Սարգսյանը եւս կլքի իշխանությունը, սակայն ի տարբերություն Կարեն Կարապետյանի, որի հետ վերադարձի հույսերը զրո են, Սերժ Սարգսյանը վարչապետի պաշտոնին հավակնող միակ թեկնածուն է, ինչն էլ ենթադրում է, որ  որքան հեռանում է Կարապետյանը, այնքան մոտենում է Սարգսյանը: Սերժ Սարգսյանը հեռացրեց Կարեն Կարապետյանին, իսկ ո՞վ է հեռացնելու Սարգսյանին: Հայաստանում դե ֆակտո ընդդիմադիր համարվող քաղաքական ուժերը միասին պայքար չեն տանում: Այս պահին Սերժ Սարգսյանի վարչապետությունը կանխելուն ուղղված որոշ քայլեր անում է «Քաղաքացիական պայմանագիր» կուսակցությունը եւ «Մերժիր Սերժին» քաղաքացիական նախաձեռնությունը: Նրանց շարքերը նոսր են: Հայաստանում հեղափոխության ուրվականն է շրջում, կհաջողի արդյո՞ք այն ցույց կտա ժամանակը: Irakanum.am