Տնտեսական մրցակցության պաշտպանության պետական Հանձնաժողովը շարունակում է մարզային այցելությունները՝ պետական գնումների ոլորտում ուսումնասիրություններ իրականացնելու, ինչպես նաեւ մարզում գործունեություն իրականացնող գործարարների հետ հանդիպման նպատակով: Այսօր Հանձնաժողովի աշխատակիցները շրջայց են կատարել Սյունիքի մարզի մի շարք սոցիալական հաստատություններում՝ գիշերօթիկ դպրոցներում, Սյունիքի մարզային նյարդահոգեբուժական դիսպանսերում եւ այլն: Այցի նպատակը նշված հաստատություններում պետական գնումների միջոցով սննդի ձեռքբերման գործընթացի վերահսկումն է: Հանձնաժողովի աշխատակիցները տեղում ուսումնասիրել են փաստաթղթերը՝ պարզելու արդյոք նշված հաստատությունները պատշաճ կերպով իրականացրել են մրցույթները, կամ որքանով են սննդի մատակարար հանդիսացող ընկերությունները բարեխիղճ գտնվել սննդի մատակարարման գործում: ՏՄՊՊՀ աշխատակիցների ուշադրության կենտրոնում էր նաեւ այն խնդիրը, թե որքանով է վերոնշյալ հաստատությունների կողմից կազմված տեխնիկական բնութագրերը, ինչպես նաեւ մրցույթների կազմակերպման գործընթացը համապատասխանում օրենքի պահանջներին: Առկա փաստաթղթերի հիման վրա, առաջիկայում Հանձնաժողովը կպարզի նաեւ, արդյոք պետական գնումների գործընթացում արձանագրվել են մրցույթի մասնակիցների նկատմամբ պատվիրատու հաստատությունների կողմից սահմանափակումներ կիրառելու դեպքեր, թե ոչ: Խոսելով Հանձնաժողովի կողմից պետական գնումների ոլորտում իրականացրած ուսումնասիրությունների մասին, ՏՄՊՊՀ նախագահ Արտակ Շաբոյանը նշել է, որ  նախկին ուսումնասիրությունները փաստում են, որ քիչ չեն դեպքերը, երբ տնտեսվարողները այս ոլորտում անբարեխիղճ մրցակցության են դրսեւորում. « Մենք նման բացահայտումներ այս ոլորտում արդեն իսկ իրականացրել ենք, երբ կարագի փոխարեն մատակարարվել է սփրեդ, կամ խտացրած կաթի փոխարեն՝ կաթ պարունակող արտադրանք եւ այլն: Այդ իսկ պատճառով շարունակում ենք ուսումնասիրությունները այս ոլորտում եւ հետեւողական ենք, որպեսզի նման խնդիրները, որոնք կարող են մրցակցության առումով որոշակի խոչընդոտներ առաջացնել, բացառվեն»: