Ազգային ժողովում ՀՀԿ խմբակցության ղեկավար Վահրամ Բաղդասարյանը ներկայացրեց բարձրագույն դատական խորհրդի անդամի թեկնածու Գագիկ Հարությունյանին՝  կոչ անելով կողմ քվեարկել Հարությունյանի թեկնածությանը։ ԱԺ «Ելք» խմբակցության ղեկավար Նիկոլ Փաշինյանը հետաքրքրվեց Գագիկ Հարությունյանից, թե արդյոք 2014 թվականին երբ իր ներկայությամբ Սերժ Սարգսյանը հայտարարել էր, որ պաշտոնապես այլևս երբեք չի առաջադրվելու ՀՀ նախագահի պաշտոնի համար, իսկ պառլամենտական կառավարման անցման ժամանակ վարչապետի պաշտոնին, արդյոք չի կատակել։ «Դուք ներկա եք եղել ու լո՞ւրջ էր ասում, թե՞ ընդեղ վերջում հումորային էլեմենտներ կար, կամ սեղանի տակից ասում էր՝ թխի գա։ Լրիվ լուրջ եմ հարցնում», - ասաց Փաշինյանը։ Նա նաև հետաքրքրվեց կան արդյոք ՀՀ-ում քաղբանտարկյալներ, և ինչու մինչև հիմա 2004 թվականի ՍԴ կայացրած որոշումը՝ անցկացնել վստահության հանրաքվե, կյանքի չի կոչվել։ Փաշինյանի մյուս հարցն էր՝ արդյոք ՀՀ-ում ընտրությունները երբևէ կեղծվել են։ «Նախագահի հետ բոլոր հանդիպումների ժամանակ չի եղել դեպք, որ ՀՀ նախագահն իր խոսքը կատակով կամ անլուրջությամբ ասի։ Սեղանի տակ սեղանի վրա ձեր ասած այդ բաները չեն եղել», - ի պատասխան ասաց Գագիկ Հարությունյանը։ Ինչ վերաբերում է ընտրություններին, Հարությունյանը նշեց, որ ՍԴ-ում ընտրությունների վերաբերյալ եղած վեճերի քննման ժամանակ ՍԴ հայտնաբերել է մի շարք խախտումներ, բայց դրանք չեն եղել այն ծավալով, որ հնարավոր կլիներ ընտրություններն անվավեր ճանաչել։ Խոսելով վստահության հանրաքվեի մասին՝ Հարությունյանն ընդգծեց, որ այդ որոշման համար իրենց աջ ու ձախ քննադատեցին, բայց իրենք միայն կարող էին առաջարկել անցկացնել նման հանրաքվեի, բայց չէին կարող պարտադրել։ Իսկ քաղբանտարկյալների մասին նա ասաց. «Պատշաճ չէի համարի ոչ հերքել, ոչ հաստատել։ Որևէ նման գործի նյութերի ծանոթ չեմ եղել, ՍԴ-ում որևէ դիմումով նման հարց չի շոշափվել»։