1in.am-ը գրում է․ Տավուշի մարզի ընդհանուր իրավասության դատարանում Սամվել Մարդանյանի նախագահությամբ ավարտվել է Սարգիս Ս.-ի գործի քննությունը:
62-ամյա Սարգիս Ս.-ին մեղադրանք էր առաջադրվել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:
Ըստ մեղադրանքի՝ Սարգիս Ս.-ն դիտավորությամբ սպանել է իր մորը:
Համաձայն քրեական գործի նյութերի՝ 2019 թվականի մարտի 15-ին, ժամը 11-ն անց 30-ի սահմաններում Տավուշի մարզի Այգեհովիտ գյուղի իրենց տանը Սարգիս Ս.-ն վիճաբանել է մոր՝ Օսան Ս.-ի հետ՝ տանը եղած շշում օղի չլինելու հարցով:
Վիճաբանության ընթացքում Սարգիս Ս.-ն իրենց պատշգամբում կացնի երկու հարված է հասցրել մոր գլխին: Օսան Ս.-ն տեղափոխվել է Իջևանի բժշկական կենտրոն, որտեղ մահացել է որդու հարվածների պատճառով ստացած վնասվածքներից :
Դեպքից երեք օր անց որոշում է կայացվել Սարգիս Ս.-ի նկատմամբ ստացիոնար դատահոգեբուժական-դատահոգեբանական համալիր փորձաքննություն նշանակելու մասին: Դատարանի որոշմամբ փորձաքննությունը նշանակվել, Սարգիս Ս.-ն տեղափոխվել է հոգեբուժական կլինիկա:
Ըստ դատահոգեբուժական փորձաքննության եզրակացության՝ Սարգիս Ս.-ն դեռ 2007 թվականից հաշվառված է եղել տեղի բժշկական կենտրոնի հոգեբուժական կաբինետում՝ «Ասթենոդեպրեսիվ համախտանիշ» ախտորոշմամբ: Ժամանակ առ ժամանակ նա բուժում է ստացել: Իսկ փորձաքննության կատարման պահին Սարգիս Ս.-ի մոտ ախտորոշվել է «Շիզոֆրենիա, հալյուցինատոր պարանոիդ ձև»:
Ըստ փորձագիտական եզրակացության՝ իրավախախտումը կատարելու պահին Սարգիս Ս.-ն եղել է հիվանդագին խանգարված վիճակում, արարքը կատարել է զառանցական ապրումների ազդեցության ներքո, ինչը նրան զրկել է իր գործողությունների վտանգավորությունը գիտակցելու և իր գործողությունները ղեկավարելու հնարավորությունից:
Սարգիս Ս.-ն ճանաչվել է անմեղսունակ:
Ըստ փորձագիտական եզրակացության՝ Սարգիս Ս.-ն չի կարող մասնակցել դատաքննչական գործողությունների, նա սոցիալապես վտանգավոր է իր և շրջապատի համար, կարիք ունի հարկադիր բուժման հատուկ տիպի հոգեբուժական բաժանմունքի պայմաններում:
Սարգիս Ս.-ի նկատմամբ բժշկական բնույթի հարկադրանքի միջոց կիրառելու գործն ընդունվել է Տավուշի մարզի ընդհանուր իրավասության դատարանի վարույթ 2019 թվականի սեպտեմբերին:
2020 թվականի հունվարի 22-ի դատական նիստի ժամանակ գործով դատախազ Վ. Սարգսյանը ներկայացրել է տեղեկանք, համաձայն որի՝ Սարգիս Ս.-ն 2020 թվականի հունվարի 9-ին մահացել է: Դատախազը նշել է, որ Սարգիս Ս.-ի նկատմամբ բժշկական բնույթի հարկադրանքի միջոց կիրառելու գործը ենթակա է կարճման՝ անձի մահվան հիմքով:
Սարգիս Ս.-ի դուստրը չի առարկել, որ հոր վերաբերյալ գործը կարճվի նրա մահվան հիմքով:
Դատարանը որոշել է՝ անմեղսունակության վիճակում ՀՀ քրեական օրենսգրքի 104 հոդվածի 1-ին մասով արգելված արարք կատարած անձ Սարգիս Ս.-ի նկատմամբ բժշկական բնույթի հարկադրանքի միջոց կիրառելու վերաբերյալ գործի վարույթը կարճել, քրեական հետապնդումը դադարեցնել Սարգիս Ս.-ի մահվան հիմքով:
Լուսանկարը՝ Armeniasputnik-ի
