ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն ընդունել է Ասիական զարգացման բանկի (ԱԶԲ) հայաստանյան մասնաճյուղի տնօրեն Շեյն Ռոզենթալին և Հայաստանում ԱԶԲ ծրագրերի ղեկավար Թոմաս Հերցին։ Նախարարը ԱԶԲ պաշտոնյային շնորհակալություն է հայտնել արդյունավետ համագործակցության համար և կարևորել համատեղ իրականացվող ծրագրերը: Ներկայացնելով ԱԶԲ-ի ուսումնասիրությունները «Հյուսիս-հարավ ճանապարհային միջանցքի» ներդրումային ծրագրի և (Մ6) Վանաձոր-Ալավերդի-Վրաստանի սահման ճանապարհի կառուցման վերաբերյալ՝ Թոմաս Հերցն իր գոհունակությունն է հայտնել դրանց տեմպերից և աշխատանքների կազմակերպման որակից։ Շեյն Ռոզենթալը ևս ընդգծել է, որ աշխատանքներում նկատելի առաջընթաց կա։ Հանդիպման ընթացքում քննարկվել են Ասիական զարգացման բանկի համաֆինանսավորմամբ իրականացվող «Հյուսիս-հարավ ճանապարհային միջանցքի» ներդրումային ծրագրին և (Մ6) Վանաձոր-Ալավերդի-Վրաստանի սահման ճանապարհի շինարարությանն առնչվող մի շարք հարցեր։ Անդրադարձ է եղել «Հյուսիս-հարավի» մի շարք հատվածներում հնագիտական պեղումների հետ կապված աշխատանքների երկարաձգման խնդիրներին։ Ընդգծվել է այդ հատվածներում մանրակրկիտ ուսումնասիրություններ անցկացնելու կարևորությունը։ Քննարկվել են նաև Վանաձոր-Ալավերդի-Վրաստանի սահման  ճանապարհի հիմնանորոգման ընթացքի, ԱԶԲ-ի հետ հետագա աշխատանքների և ծրագրի հետ կապված մի շարք հարցեր։