Երևանի ընդհանուր իրավասության դատարանի Շենգավիթի նստավայրում շարունակվում է «Սասնա ծռեր»  խմբի 10  անդամի գործով դատաքննությունը: Մեղադրող-դատախազները շարունակում են հրապարակել գրավոր ապացույցները: Մեղադրող-դատախազներ Պետրոս Պետրոսյանն ու Արամ Արամյանը հրապարակում են ՊՊԾ գնդի տարածքում գնդի գրավումից հետո տարբեր շինություններից հայտնաբերված ռազմամթերքի փորձագիտական եզրակացությունները: Փորձագետներ Համբարձումյանի եւ Ավետիսյանի արձանագրությունների համաձայն՝ գնդի տարածքում հայտնաբերված տասնյակ ատրճանակները, փամփուշտները, ինքնաձիգերը հանդիսանում են ռազմամթերք եւ պիտանի են նպատակային օգտագործման՝ կրակելու համար: Դրանց մի մասն օգտագործված է եղել: Կրակոցների վաղեմության ժամկետը հանարավոր չի եղել որոշել՝ համապատասխան գիտական մեթոդիկայի բացակայության պատճառով: ՊՊԾ գնդի բուժկետում հայտնաբերվել է նռնակ իր պայթուցիչով, որը հանդիսանում է օգտագործման համար պիտանի ռազմամթերք: Նշյալ փորձագիտական եզրակացությունների իրականացման համար ծախսվել է հիմնականում 67, 50, 33, 35, 62 հազարական դրամ: Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: Պավել Մանուկյանը հանդես եկավ հայտարարությամբ՝ նշելով, որ Գլխավոր շտաբի պետի պաշտոնն զբաղեցնող Մովսես Հակոբյանն, օրինակ, սպա չէ, թեև գեներալ-գնդապետի կոչում ունի։ «Որովհետև նա պատիվ չունի։ Նրա համար կարևոր է թալանելու և իշխելու նպատակով պաշտոն ունենալը, հանուն որի նա մեկ ուրիշ անպատիվ արարածի՝ Գերագույն գլխավոր հրամանատարի պաշտոնն զբաղեցնող Սերժ Սարգսյանի, հետևից թութակի նման կրկնում է, որ Ապրիլյան քառօրյայի ժամանակ հակառակորդի գրաված տարածքը ռազմավարական նշանակություն չունի»,-ասաց նա։