ՀՀ ՊԵԿ նախագահ Վարդան Հարությունյանի ղեկավարած կառույցը պետական բյուջեի միջոցները անարդյունավետ ծախսելու առումով թերեւս քիչ մրցակիցներ ունի: Մինչ վարչապետ Կարեն Կարապետյանը հայտարարում է, թե անհրաժեշտ է հարկատուների գրպանից գոյացող միջոցները արդյունավետ ծախսել, եւ խնայողություններ անել, ՊԵԿ նախագահ Վարդան Հարությունյանը հակառակն է անում: Irakanum.am-ը պարզեց, որ Կառավարությանն առընթեր Պետական եկամուտների կոմիտեն միայն 55 միլիոն դրամ է վճարել Հայ փոստին փոստային ծառայությունների համար: Տպավորություն է ստեղծվում, թե ՊԵԿ-ում դեռ քարե դարն է, եւ այստեղ մարդիկ հաղորդակցվում են բացառապես փոստի միջոցով: Ամբողջ աշխարհը վաղուց անցում է կատարել էլեկտրոնային հաշվետվության տարբերակին, բացի Վարդան Հարությունյանի ղեկավարած ՊԵԿ-ից: Այստեղ դեռ նամակները եւ հաշվետվությունները փոստի միջոցով են ուղարկում, դրա դիմաց հսյակական  գումարներ վատնելով: «Հաշվետվությունների Ներկայացման Էլեկտրոնային Համակարգը նախատեսված է պարզեցնելու հարկային հաշվետվությունների հանձնման գործընթացը և ավտոմատացնելու հարկային հաշվետվությունների լրացումն ու ստուգումը։ Համակարգը հաշվետվությունների լրաց­ման ընթացքում կկատարի անհրաժեշտ ստուգումներ դաշտերի լրացման եւ մաթեմատիկական հաշվարկների ճշտությունն ապահովելու նպատակով։ Հա­մա­կարգը կդառնա հաշվետվությունների վրա աշխատելու հարմարավետ եւ վստա­հելի գործիք, այն անմիջապես կարտացոլի օրենսդրական եւ նորմատիվ բոլոր փոփոխությունները, որոնք առնչվում են հաշվետվությունների ներկայացմանն ու հարկային պարտավորությունների հաշվարկման դրույքաչափերին եւ բանաձեւերին»։  Սա հատված էր ՊԵԿ կայքից: Վարդան Հարությունյանին չէր խանգարի գոնե մեկ անգամ կարդար  ղեկավարած կառույցի պաշտոնական կայքում զետեղված եւ նրա ու տեղակալների կողմից թմբկահարվող տեղեկատվության մասին, թե վաղուց անցում են կատարել էլեկտրոնային հաշվետվությունների ներկայացման մեխանիզմին: Համեմատության համար նշենք, որ օրինակ Սփյուռքի նախարարությունը Հայ փոստին փոստային ծառայությունների դիմաց վճարել է 5 միլիոն դրամ: Փայլակ Ֆահրադյան