Անգլիական «Էվերտոնի» նորանշանակ իտալացի գլխավոր մարզիչ Կարլո Անչելոտին թույլ չի տա թիմի 19-ամյա հարձակվող Մոյզե Քինի վերադարձն Իտալիա։ Նա շանս կտա ֆուտբոլիստին։ Ավելի վաղ իտալական մամուլը գրել էր, որ Քինը կտեղափոխվի «Ռոմա»։ «Ես ցանկանում էի Քինին հրավիրել «Նապոլի» դեռ մինչեւ նրա տեղափոխություը «Էվերտոն»։ Մոյզեն ֆանտաստիկ խաղացող է։ Մի մոռացեք, որ նա ընդամենը 19 տարեկան է։ Պետք է համբերատար լինել եւ նրան հանգիստ աշխատելու հնարավորություն տալ։ Նա ունի հրաշալի որակներ»,- Անչելոտիի խոսքը մեջբերում է ակումբի մամուլի ծառայությունը։ Ընթացիկ մրցաշրջանում Քինը բոլոր մրցաշարերում մասնակցել է 16 հանդիպման, կատարել 1 գոլային փոխանցում։ Իտալիայի հավաքականի ֆուտբոլիստը «Էվերտոն» է տեղափոխվել այս տարվա օգոստոսին «Յուվենտուսից» 30 միլիոն եվրոյով՝ կնքելով 5 տարվա պայմանագիր։