Լեզվաբան Նարինե Դիլբարյանի համոզմամբ՝ այսօրվա դրությամբ մեր բանակի մարտոթնակության աստիճանն առավել բարձր է, բանակն ամեն րոպե պատրաստ է արձագանքելու ցանկացած սադրանքների, որոնք բացառված չեն՝ հաշվի առնելով Ադրբեջանի մշտական պահվածքը: «Սակայն մի շարք հանգուցային խնդիրներ մնացին, թե ինչու տանկերում վառելիք չկար, օրինակ: Մենք արդեն առաջնորդվում ենք աստվածաչնյան առակով, որ արթուն եղեք, որովհետև չգիտեք հարձակման ոչ օրը, ոչ ժամը»,-այս մասին նա նշեց այսօր ասուլիսի ժամանակ:
Քաղաքական գործիչ Ազատ Արշակյանն էլ հիշեցնելով, որ ապրիլյան քառօրյա պատերազմին մենք 800 հեկտար տարածք կորցրինք՝ նշեց. «Հարձակվեցին, որովհետև գիտեին, որ 800 հեկտար հանձնող կա»: Ըստ նրա՝ մենք պետք է զգոն լինենք, հասկանանք, որ ոչ միայն հայ լինելն է վտանգավոր աշխարհում, այլև հայկական պետությունն է անընդհատ վտանգված, արձակուրդ, ընդմիջում չկա, հայրենինքը պետք է պաշտպանված լինի և անընդհատ պաշտպանված լինի:
Ինչ վերաբերում է նրան, որ Ադրբեջանում առաջիկայում արտահերթ ընտրություններ են սպասվում, իսկ Հայաստանում էլ նախագահի լիազորություններն են դադարելու, և լիովին անցում է կատարվելու խորհրդարանական համակարգին, նոր կառավարություն է նշանակվելու, Նարինե Դիլբարյանն ընդգծեց. «Դեռևս չի նշվում, թե ով է լինելու վարչապետի թեկնածուն, իհարկե, գրեթե կասկած չկա, որ դա Սերժ Սարգսյանն է լինելու, բայց ամեն դեպքում չեն հայտարարում, և սրանով անորոշությունների դաշտը մեծացվում է: Հասարակական ընդվզում կա, քայլարշավ կա, հանրահավաքներ, որոնք դեռևս թվում են ոչ վտանգավոր, սակայն կան նախադրյալներ, կա դաշտ, որ կարող է բերել համահավաք բողոքի դրսևորումների:
Այսօր իշխանության և հասարակության միջև փոխըմբռնման եզրերը գնալով պակասում են, այնպես է արվում, որ խորանան հակասությունները, իսկ դա բավական վտանգավոր քաղաքականություն է, իսլ Ալիևը իր վարկանիշը բարձրացնելու համար կարող է հարձակվել»:
Սակայն, ըստ նրա, եթե այս անգամ էլ մի թիզ հող անգամ նվաճվի, ապա հասարակական ցնցում կլինի:
Իսկ Ազատ Արշակյանն էլ ավելացրեց, որ այսօր ընդդիմությունը սխալ օրակարգով է առաջ շարժվում՝ պահանջելով, որ Սերժ Սարգսյանը չդառնա վարչապետ: «Կոնկրետ անձի դեմ պայքարելը սխալ է, օրակարգը դա չպիտի լինի»,-նշեց նա: Արշակյանը գտնում է, որ պիտի կասկածի տակ դրվեն ապրիլի 2-ի խորհրդարանական ընտրություններ, պետք է հայտարարվի, որ անհրաժեշտություն կա ցրել Ազգային ժողովը:
00:00:00
