Համայնքների տնտեսական և սոցիալական զարգացմանն ուղղված կառավարության 2018 թվականի սուբվենցիոն ծրագրով կապիտալ հիմնանորոգվում է «Աբովյանի N 3 միջհամայնքային մանկապարտեզ» ՀՈԱԿ-ի մասնաշենքը: Մարզպետարանից  հայտնում են, որ երկու ընդարձակ հարկերից բաղկացած մասնաշենքում աշխատանքները արագ տեմպերով իրականանում են ու նախատեսված է դրանք ավարտին հասցնել արդեն դեկտեմբեր ամսին, որից հետո մասնաշենքը կկահավորվի համապատասխան գույքով ու պատրաստ կլինի ընդունելու մանուկների նոր խմբերի: Նշենք, որ այժմ մանկապարտեզ է հաճախում շուրջ 145 երեխա: Ենթադրվում է, որ նոր մասնաշենքի շահագործումից հետո հաճախող երեխաների թիվը կհասնի մինչև 210-ի: Նոր մասնաշենքը հիմնանորոգվում է շինարարական բոլոր նորմերին համապատասխան: Յուրաքանչյուր խմբասենյակ ունենալու է խոհանոց, սանհանգույց, խաղասենյակ, ննջասենյակ: Երեխաների համար ստեղծված են բոլոր պայմանները նաև ակտիվ կենսակերպի համար. կա մարզադահլիճ, մեթոդ կաբինետ, իսկ մանկապարտեզի բակում առանձնացված են ծաղկանոցներ, որոնք մշակելու են հենց փոքրիկները: Շահած ծրագրի արժեքն է 125.700.000 դրամ, որից պետական ֆինանսավորման չափը 40% է, իսկ համայնքի ներդրումը՝ 60%: Հիշեցնենք, որ Կոտայքի մարզպետը բազմիցս ընդգծել է մարզի բոլոր համայնքները նախադպրոցական կրթության հաստատություններով ապահովման անհրաժեշտությունը՝ որպես մարզային խնդիրների լուծման տեսանկյունից առաջնահերթություն: