Հայ-բուլղարական հարաբերությունները հիմնված են պատմական բարեկամության և բազմաթիվ մշակութային առնչությունների վրա, ինչը հիմք է ստեղծում այսօրվա միջպետական հարաբերությունների համապարփակ զարգացման համար։ ՀՀ ԱԳՆ-ում Բուլղարիայի փոխվարչապետ Եկատերինա Զախարիևայի հետ համատեղ մամուլի ասուլիսի ժամանակ ասաց ԱԳ նախարար Զոհրաբ Մնացականյանը։ «Հայաստան-Բուլղարիա հարաբերությունները զարգանում են ինչպես երկկողմ ձևաչափում, այնպես էլ բազմակողմ ու ակտիվ մասն են կազմում ՀՀ-ԵՄ երկխոսության կոնտեքստում»,-ասաց նախարարը։ Նա ընդգծեց, որ տնտեսական հարաբերությունները ևս ակտիվ զարգանում են, սակայն դեռևս առաջընթացը բավարար չեն կարող գնահատել. «Առկա է մեր տնտեսական հարաբերությունների ընդլայնման և խորացման ներուժի օգտագործման համար քայլերի նախանշման հենք»։ ԱԳ նախարարը նաև ընդգծեց, որ հայ-բուլղարական հարաբերությունների առանցքում ժողովուրդների, հասարակությունների միջև կապերի ամրապնդումն է. «Այդ համատեքստում կարևորում եմ նաև ուղիղ կապի ձևավորումը, այդ թվում Երևան-Սոֆիա թռիչքների մեկնարկի միջոցով, ինչը կնպաստի տնտեսական և տուրիստական բնագավառներում համագործակցությանը, մշակութային և մարդկային կապերին»,-հավելեց Զոհրաբ Մնացականյանը։