Հունվարի 1-ից ուժի մեջ մտնող Հարկային օրենսգրքի փոփոխություններով պայմանավորված՝ 2020 թվականին սոցիալական և տնտեսական վիճակի փոփոխություն է ակնկալվում:
Այսօր ԱԺ-ում 2020 թվականի բյուջեի նախագծի քննարկման ժամանակ ասաց ՀՀ վարչապետ Նիկոլ Փաշինյանը:
«2020-ի հունվարի 1-ից Հարկային օրենսգրքի փոփոխություններն ուժի մեջ են մտնում: Մոտավոր հաշվարկով շուրջ 200 հազար քաղաքացու աշխատավարձ բարձրանալու է Հարկային օրենսգրքի փոփոխության արդյունքում: Եկամտահարկի համար հարթ դրույքաչափ ենք սահմանել, փաստացի հենց դրա արդյունքում այդ աշխատավարձի բարձրացումը կլինի»,- ասաց Փաշինյանը:
Նա նկատեց, որ կենսաթոշակների միջին չափի բարձրացում է նախատեսվում 10 տոկոսի չափով, իսկ 2020 թվականի հուլիսի 1-ից երեխայի ծննդյան միանվագ նպաստի չափն էլ կադառնա 300 հազար դրամ:
