Կառավարության այսօրվա՝ հոկտեմբերի 24-ի նիստում տիեզերական գործունեության համար հարկային արտոնություններ նախատեսելու վերաբերյալ քննարկման ժամանակ միջադեպ գրանցվեց: Քաղաքաշինության կոմիտեի ղեկավար Վահագն Վերմիշյանը դրական գնահատեց այդ նախագիծը՝ նշելով, որ Հայաստանը փոքր երկիր է, սակայն տիեզերական գործունեության ոլորտում պատմություն ունի. «Գրիգոր Գյուրզադյանի օպտիկական սարքեր առ այսօր օգտագործվում են տիեզերագնացության մեջ: Մենք պետք է հարց տանք՝ ում համար ենք էս երկիրը ուզում՝ հնդիկների՞, պակիստանցիների՞, թե՞ ինտելեկտուալ մարդկանց համար, որոնց ուզում ենք ներգրավել»,- ասաց Վահագն Վերմիշյանը։ «Պարո՛ն Վերմիշյան, կներեք, բայց կոռեկտ արտահայտություն չեք անում»,- նրան ընդմիջեց վարչապետ Նիկոլ Փաշինյանը։ «Կներեք … այսինքն՝ ցածր կրթական ցենզ ունեցող մարդկա՞նց, թե՞ ինտելեկտուալների համար»,- փորձեց իր ասելիքն ուղղել Վահագն Վերմիշյանը։