Արցախի Հանրապետության մշակութային կենտրոն Շուշի քաղաքում սեպտեմբերի 6-ին տեղի է ունեցել Հայաստանի և Արցախի խորհրդարանների գիտության, կրթության, մշակույթի, սպորտի և երիտասարդության հարցերը համակարգող մշտական հանձնաժողովների միջև հուշագրի ստորագրման արարողությունը:
Հանձնաժողովների նախագահներ Մխիթար Հայրապետյանն ու Արմեն Սարգսյանն իրենց խոսքում կարևորել են հայկական երկու պետությունների օրենսդիր մարմինների միջև աշխատանքների խորացումը, ինչի վառ ապացույցն է սույն հուշագրի կնքումը:
Հուշագիրը, ինչպես նշել է Մխիթար Հայրապետյանը, բացի հռչակագրային հոդվածներից նախատեսում է ակտիվ համագործակցային միջավայր ստեղծող կոնկրետ դրույթներ, ինչն էլ նոր որակ կհաղորդի հանձնաժողովների աշխատանքներին: Հուշագրի կնքումից հետո ՀՀ ԱԺ մշտական հանձնաժողովի պատգամավորները հանդիպել են Արցախի ԱԺ իրենց գործընկերների և ոլորտային նախարարներ Նարինե Աղաբալյանի և Լեռնիկ Հովհաննիսյանի հետ, քննարկել են երկուստեք հետաքրքրություն ներկայացնող բազմաթիվ հարցեր:
00:00:00
