Ֆուտբոլի Եվրոպայի 2020 թվականի առաջնության որակավորման հերթական փուլի շրջանակներում Հայաստանի ընտրանին Վազգեն Սարգսյանի անվան Հանրապետական մարզադաշտում հյուրընկալել է Իտալիային: Առաջին կես՝ 1:1: «Արմենպրես»-ի հաղորդմամբ՝ մեկնարկային 10 րոպեներին Հայաստանի ընտրանին կարծես տիրել էր նախաձեռնությանը: Եվ արագ գոլը երկար սպասեցնել չտվեց: Խաղի 11-րդ րոպեին Հայաստանի ընտրանուն առաջ մղեց թիմի հարձակվող Ալեքսանդր Կարապետյանը: Բաց թողած գոլից հետո Իտալիան ամբողջ թիմով նետվեց գրոհի և տիրեց խաղային իրավիճակին: Խաղի 25-րդ րոպեին կրքերը բորբոքվեցին և Իտալիայի  հավաքականի կազմում դեղին քարտ ստացավ Վերատին, իսկ Հայաստանից՝ Ղազարյանը և Կարապետյանը: Հանդիպմանը 27-րդ րոպեին Իտալիայի ընտրանին վերականգնեց հաշվի հավասարությունը: Աչքի ընկավ Անդրեա Բելոտին: Իսկ խաղակեսի վերջում Հայաստանի ընտրանին մնաց 10 ֆուտբոլիստով՝ երկրորդ դեղին քարտը ստացավ և հեռացվեց Ալեքսանդր Կարապետյանը: Թիմերն ընդմիջման գնացին հավասար հաշվով՝ 1:1: Հանդիպմանը մարզադաշտից հետևում են ՀՀ վարչապետ Նիկոլ Փաշինյանը և ՈՒԵՖԱ-ի նախագահ Ալեքսանդր Չեֆերինը: Մրցաշարային աղյուսակում այս խաղից առաջ առաջատար Իտալիան է, որն ունի 12 միավոր: Երկրորդ տեղում Ֆինլանդիան է 9 միավորով, իսկ Հայաստանի ընտրանին 6 միավորով 3-րդ տեղում է: