Կառավարությունն այսօր   որոշեց առողջապահության նախարարությանը կհատկացնել հավելյալ գումար։ Դա արվում է  բյուջեի 62 միլիարդ հավելյալ մուտքի հաշվին՝   առողջապահության ոլորտում պետության կողմից անվճար և արտոնյալ պայմաններով մատուցվող ծառայությունների շրջանակն ու դրանցից օգտվող շահառուների շրջանակը  ընդլայնելու նպատակով։ Կառավարության  նիստի ընթացքում  առողջապահության  փոխնախարար Անահիտ Ավանեսյանը նշեց,․ «Սոցիալապես անապահով և հատուկ խմբերում ընդգրկվածների բժշկական օգնության համար հատկացնել լրացուցիչ 5․1 միլիարդ դրամ՝ սրտի վիրահատական ծառայությունների և նորագույն տեխնոլոգիաներով մատուցվող բժշկական ծառայություններից պետպատվերով օգտվող շահառուների շրջանակն ընդլայնելու և մարդու օրգանների՝ 12 երիկամի և 11 ոսկրածուծի փոխպատվաստման հաամր։ Այս փոփոխություններից ընդհանուր առմամբ օգտվելու է 500 հազար քաղաքացի։ Նախատեսված փոփոխություններով 0-18 տարեկանների բժշկական ծառայությունների մատուցումը կդառնա անվճար»։ Ընդգծենք՝ այս նախագծով  բուժաշխատողների աշխատավարձը ևս առաջարկվում է բարձրացնել։ Կառավարությունը հավանություն տվեց նախագին, իսկ վարչապետ Փաշինյանը նշեց՝  Կառավարությունն այս բեռը վերցնում է ծնողի վրայից, որպեսզի նա Աստված մի արասցե, եթե երեխան հիվանդանա, կարողանա  նրան հիվանդանոց տանել՝ չմտածելով՝ որտեղից գումար հայթայթել, և ի վերջո, որպեսզի մարդիկ կարողանան   բուժծառայություններից օգտվելու համար տնտեսած  գումարը  ծախսել այլ անհրաժեշտ խնդիրներ լուծելու համար։