Ազգային ժողովում քննարկվում է «Ազգային ժողովի կանոնակարգ» սահմանադրական օրենքում փոփոխություններ և լրացումներ կատարելու մասին» և կից ներկայացված նախագծերի փաթեթը, որի հեղինակն է ԱԺ նախագահ Արարատ Միրզոյանը։ Նախագծով նախատեսվում է ընդլայնել Կառավարության ու Ազգային ժողովի լիազորություններն՝ ի հաշիվ վարչապետի լիազորությունների: Արարատ Միրզոյանը նշեց, որ այս փաթեթով փոփոխություն է նախատեսվում «ԱԺ կանոնակարգ» սահմանադրական օրենքում, ինչպես նաև ՏՄՊՊՀ-ին ու ՀԾԿՀ-ին, կոռուպցիայի կանխարգելմանը և այլնին վերաբերող օրենքներում։ Ըստ նախագծի հեղինակի՝ փոփոխությունների հիմնական նպատակն է խորհրդարանական կառավարմամբ պայմանավորված՝ կտրուկ բարձրացնել ԱԺ-ի դերը ինքնավար մարմինների ձևավորման հարցում, նաև ԱԺ-ի դերի բարձրացման շրջանակներում՝ ընդդիմադիր և կառավարման ֆրակցիաների դերակատարումների հատուկ ընդգծումն է, ինչպես նաև կոռուպցիայի հանձնաժողովի շուտափույթ ձևավորումը։ Ըստ նրա, նախագծով առաջարկվում է փոխել Տնտեսական մրցակցության պետական պաշտպանության հանձնաժողովի (ՏՄՊՊՀ) և Հանրային ծառայությունները կարգավորող հանձնաժողովի (ՀԾԿՀ) ձևավորման սկզբունքները։ «Այսօր գործող կարգավորումներով՝ այդ հանձնաժողովների նախագահներին և անդամներին ԱԺ-ն նշանակում է վարչապետի առաջարկությամբ: Նոր օրինագծով նախատեսվում է, որ նշված հանձնաժողովների առաջին կազմի նախագահների լիազորությունները դադարելուց կամ դադարեցվելուց հետո հանձնաժողովի նախագահի թափուր պաշտոններում թեկնածու առաջադրելու իրավունքը վարչապետի փոխարեն վերապահվելու է Կառավարությանը»,-ասաց նա: Անդրադառնալով այս նախագծին՝ «Լուսավոր Հայաստան» խմբակցության պատգամավոր Անի Սամսոնյանն ասաց՝ այս նախագւծը կռիվ է գցում ընդդիմության մեջ, քանի որ ընդդիմադիր ուժերը կարող են յուրաքանչյուրը տարբեր թեկնածուների առաջարկել ու համաձայնության չգալ։ Ի պատասխան դրա ՝ ասաց «Իմ քայլը» խմբակցության անդամ Աննա Կարապետյանը նշեց․ «Էն որ ասում եք՝ ընդդիմության մեջ կռիվ եք գցում, այդ նախագիծն ուշադի՞ր եք կարդացել»։