Արաբական Միացյալ Էմիրությունները թողարկել է մշտական բնակության համակարգ հարուստ ներդրողների եւ «բացառիկ տաղանդների» համար:
«Ոսկե քարտ» ծրագիրը բաց է բժիշկների, ինժեներների, գիտնականների եւ նկարիչների համար: Այս մասին հայտարարել է ԱՄԷ-ի վարչապետ շեյխ Մուհամմեդ բին Ռաշիդ ալ-Մակտումը, որը նաեւ Դուբայի ղեկավարն է, հաղորդում է AFP-ը:
«Մենք ցանկանում ենք, որ նրանք մեր մշտական գործընկերները լինեն»,- ասել է նա՝ նշելով, որ մոտ 6800 ներդրողներից կազմված առաջին խումբը մշտական բնակության թույլտվություն կստանա:
Սա առաջին նման համակարգն է Պարսից ծոցի երկրներում, որտեղ օտարերկրացիներին, որպես կանոն, սահմանափակ մշտական բնակության թույլտվություն են տրամադրում:
ԱՄԷ-ում օտարերկրացիները կազմում են բնակչության 90%-ը: ԱՄԷ-ն արաբական աշխարհի տնտեսության մեծությամբ երկրորդ երկիրն է, որը վերջին տարիներին սրընթաց զարգացում է ապրում:
