Անվտանգության խորհրդի քարտուղար Արմեն Գրիգորյանն այսօր հանդիպել է ՀՀ–ում ԱՄՆ արտակարգ և լիազոր դեսպան Ռիչարդ Միլսին։ Այս մասին Գրիգորյանը հայտնել է ֆեյսբուքյան իր էջում։ «Դեսպան Միլսի հետ զրուցեցինք անվտանգության կարևոր մարտահրավերների մասին: Մասնավորապես անդրադարձ կատարվեց կոռուպցիայի և տնտեսական զարգացման հիմնախնդիրներին: Ողջունելով նոր կառավարության ջանքերը, դեսպանը պատրաստակամություն հայտնեց աջակցել Հայաստանի կայուն զարգացմանն ուղղված նախաձեռնություններին: Նա կարևորեց Անվտանգության Խորհրդի դերը Լեռնային Ղարաբաղի հակամարտության կարգավորման գործընթացում և նշեց, որ Միացյալ Նահանգները շարունակում են աջակցել ԵԱՀԿ Մինսկի խմբին՝ տարածաշրջանում կայունության և անվտանգության պահպանման շրջանակներում:

Դեսպանը նշեց նաև ՀՀ կարևոր դերը միջազգային խաղաղապահ առաքելություններում»,– գրառման մեջ նշում է Արմեն Գրիգորյանը։