Հիշեցնենք, որ ԵԿՄ նախկին նախագահ Մանվել Գրիգորյանի վերաբերյալ բացահայտումներից հետո տարբեր ժամանակներում կառույցից հեռացած ազատամարտիկները հայտարարեցին ԵԿՄ վերադառնալու մասին: Նրանք ԵԿՄ վարչության 3 փոխնախագահների հետ միասին նիստ արեցին, կազմկոմիտե ձևավորվեց, որը պետք է զբաղվեր ապագա համագումարի հարցերով, սակայն այս առաջարկը ԵԿՄ ակտիվը չընդունեց։
Վերադարձի մասին հայտարարած ազատամարտիկների կարծիքով՝ ԵԿՄ-ն այլևս նախագահ չպետք է ունենար, այլ պետք է կառավարվեր խորհրդի միջոցով։ Սակայն, հուլիսի 5-ին տեղի ունեցած ԵԿՄ ակտիվի նիստին ԵԿՄ վարչության նախագահի պաշտոնում ներկայացվել էր Արամ Զավենի Սարգսյանի թեկնածությունը: Որոշվել էր նաև սեպտեմբերին հրավիրել ԵԿՄ արտահերթ համագումարը, որի ընթացում էլ կընտրվի նոր վարչություն և նախագահ: Արամ Սարգսյանի առաջադրումը դժգոհություններ էր առաջացրել վերադառնալու ցանկություն հայտնած ազատամարտիկների շրջանում, ովքեր կողմ էին խորհրդի ձևով կառավարմանը:
ԵԿՄ փոխնախագահ Ղուկաս Ուլիխանյանը խնդիր չի տեսնում, որ Արամ Սարգսյանը, լինելով «Հանրապետություն» կուսակցության նախագահ և «Ելք» դաշինքի անդամ, դառնալու է ԵԿՄ նախագահ: Ըստ նրա՝ Երկրապահ կամավորականների միությունը հասարակական կազմակերպություն է, և օրենքը չի արգելում, որ որևէ կուսակցության ղեկավար նաև լինի ԵԿՄ նախագահ:
Հարցին, թե առաջիկա ընտրություններում ԵԿՄ անդամների ձայները չեն գնա «Ելք» դաշինքին կամ «Հանրապետություն» կուսակցությանը, Ղ. Ուլիխանյանը պատասխանեց. «Երկրապահն ազատ է իր գործունեության մեջ: Արամ Սարգսյանը նշել է, որ որևէ կուսակցական, քաղաքական խնդիր չի լինելու, և կարծում եմ՝ յուրաքանչյուր ոք ազատ է լինելու իր որոշումների մեջ»:
Մեկ այլ հարցի, թե նախկինում՝ Մանվել Գրիգորյանի ղեկավարման տարիներին նույնպես ԵԿՄ-ն ազատ է եղել, կառույցի փոխնախագահը նշեց. «Անկախ որևէ երկրապահի կոչից յուրաքանչյուր երկրապահ ինքն ազատ էր կայացնում իր որոշումները: Եվ այդպիսի մեխանիզմ էլ չկար հսկելու»:
Կարծիքներ են հնչում, որ Մանվել Գրիգորյանի հետ կապված բացահայտումներից հետո ԵԿՄ նոր կառավարման խորհրդի ձևավորման ակտիվ անդամների ազատամարտիկ, ԱԺ նախկին պատգամավոր Ռուստամ Գասպարյանը Գագիկ Ծառուկյանի կողմից էր ուղարկվել ԵԿՄ, որպեսզի նա կարողանար ԵԿՄ ձայները «Ծառուկյան» դաշինք ուղղել:
«Հուսով եմ, որ բոլոր ազատամարտիկները, ովքեր վերջին իրադարձություններից անմիջապես հետո եկել էին ԵԿՄ, բոլորն ինքնաբուխ, սրտացավ կերպով էին եկել: Թե ում մտքին ինչ է եղել, ես ավելի բան չեմ կարող ասել»,- ասաց Ղուկաս Ուլիխանյանը:
Նրա խոսքով՝ ԵԿՄ ակտիվը կանգ է առել Արամ Սարգսյանի թեկնածության վրա՝ հաշվի առնելով Արամ Սարգսյանի ազնվությունը, նվիրվածությունը Հայաստանին, կազմակերպվածությունը, կամային հատկությունները, ինչպես նաև Վազգեն Սարգսյանի եղբայր լինելու հանգամանքն է հաշվի առնվել:
Շատերը ԵԿՄ ղեկավարի պաշտոնում տեսնում էին պատերազմական գործողություններին ավելի ակտիվ մասնակցած անձի, ազատամարտիկի, բայց ԵԿՄ-ում այլ կարծիքի են. «Մեկ անգամ՝ 1999 թ.-ից հետո, Երկրապահը փորձել է այդ սկզբունքով, հիմա էլ այս սկզբունքով ենք անում: Մեր կանոնադրությունը նման արգելք չի սահմանում՝ ով քանի օր է կռվել, որ մարտերին է մասնակցել: Ես նման խնդիր չեմ տեսնում, կանոնադրությունն էլ չի արգելում»,- նշեց ԵԿՄ փոխնախագահը: