ՀՀ վարչապետ Նիկոլ Փաշինյանը քիչ առաջ Վայոց Ձորի մարզի Կեչուտ համայնքում հանդիպեց Ամուլսարի հանքավայրի շահագործման դեմ բողոքող ցուցարարներին: NEWS.am-ի թղթակիցը հաղորդում է, որ վարչապետը ցուցարարներին առաջարկեց, որ այս խնդրի բոլոր կողմերին հանդիպելուց հետո հավաքվեն ու միասին քննարկեն ստեղծված իրավիճակը: Նրա խոսքով, այսպես փողոցում խնդիրը քննարկելը ճիշտ չէ, պետք է նստել սեղանի շուրջ, բոլոր կողմերի մասնակցությամբ քննարկել իրավիճակն ու լուծում գտնել: Նշենք, որ Ամուլսարի հանքի բացման կողմնակիցները այս պահին Գնդեւազ համայնքում են, նրանք հիմնականում «Լիդիան Արմենիա» ընկերության աշխատակիցներն են, որոնք բողոքում են, որ ցուցարարներն արդեն երկու շաբաթ է, փակել են Ամուլսար տանող բոլոր ճանապարհները, ինչի պատճառով իրենք չեն կարողանում աշխատանքի գնալ: Վարչապետն այժմ Կեչուտից ուղեւորվել է Գնդեւազ՝ հանդիպելու բողոքողների այդ խմբին: Նշենք, որ արդեն 13-րդ օրն է, ինչ Ամուլսարի հանքի շահագործման դեմ բողոքող ակտիվիստները փակ են պահում դեպի Ամուլսար տանող ճանապարհները` պահանջելով դադարեցնել հանքի շահագործումը: Նրանք բողոքում են հանքի շահագործման դեմ եւ պահանջում են դադարեցնել աշխատանքները: Միջազգային փորձագետները, որոնք տեղում ծանոթացել են իրավիճակին, պնդում են, որ «Ամուլսարում» հանքի շահագործումը վտանգում է Հայաստանի ջրային ռեսուրսները: Մասնավորապես, մեծ է թթվային դրենաժի հնարավորությունը եւ եթե այդպիսի բան լինի մակերեւութային եւ ստորգետնյա ջրերում, ապա դա արտազատվելու է եւ ջրերի մեջ է մտնելու: Քանի որ թթվային դրենաժը հարյուրավոր տարիներ է տեւելու, փորձագետները պնդում են, որ Ամուլսարի հանքը շահագործող «Լիդիան ինթերնեշնլ» ընկերությունը պետք է մաքրման կայան կառուցի, որը պետք է գործի ոչ միայն հանքի շահագործման առաջին օրվանից մինչեւ փակումը, այլեւ շահագործումից հետո եւս առնվազն 200 տարի. «Հնարավոր ռիսկերը, կարող են տեւել հավերժ, քանի որ առաջանալու են թունավոր թափոններ, որոնք առաջացնում են թթվային դրենաժ, որը կարող է ազդել ջրային համակարգի, դրա մեջ բնակվող կենսաբազմազանության վրա»: «Լիդիան Արմենիա» ընկերությունը, սակայն, անդրդրվելի է. մի քանի օր է՝ ցույցեր են անում նաեւ ընկերության աշխատակիցները՝ պահանջելով չխանգարել իրենց աշխատանքին: Ըստ ընկերության գործադիր տնօրեն Հայկ Ալոյանի՝ բողոքի ակցիաների պատճառով արդեն իսկ 3.5 միլիոն դոլարի վնաս են կրել: Ընկերությունը մտադիր է դիմել դատարան: