Ադրբեջանի իշխանությունների կողմից արված և արվող ռազմաշունչ, ռազմատենչ հայտարարությունները շատ ապակառուցողական են և ոչ մի կերպ չեն նպաստում բանակցային գործընթացին, դրա արդյունավետությանը:
Այս մասին Tert.am-ի հետ զրույցում ասաց Արտաքին գործերի նախարարի տեղակալ Ռուբեն Ռուբինյանը՝ անդրադառնալով Ադրբեջանի իշխանությունների կողմից հնչող հայտարարություններին և այդ համատեքստում Հայաստանի և Ադրբեջանի արտգործնախարարների հանդիպմանն անհրաժեշտությանը:
«Հանդիպման մասին որևէ պայմանավորվածություն այս պահի դրությամբ չկա, և որևէ ֆիքսված օր նույնպես չկա»,- ասաց նա՝ ամեն դեպքում հավելելով, որ հանդիպման ուղղությամբ աշխատանքներ տարվում են, և իր կարծքով՝ այդ աշխատանքները միայն տուժում են Ադրբեջանի կողմից արվող ապակառուցողական և ռազմատենչ հայտարարություններից:
Հիշեցնենք, որ ԵԱՀԿ Մինսկի խմբի համանախագահները հայտարարություն են տարածել Հայաստան կատարած այցից հետո, ըստ որի` համանախագահներն ու Հայաստանի պաշտոնյաները դիտարկել են բանակցությունների կարգավիճակն ու քննարկել գործընթացն առաջ մղելուն ուղղված հետագա քայլերը, այդ թվում՝ մոտ ապագայում նախարարական հանդիպման կազմակերպումը:
Ինչ վերաբերում է Ադրբեջանի հայտարարությունների վերաբերյալ միջազգային կառույցների, մասնավորապես՝ Մինսկի խմբի համանախագահների անհրաժեշտ արձագանքին, Ռուբեն Ռուբինյանը նշեց. «Պետք է հաշվի առնենք, որ ընդհանրապես արտաքին քաղաքականությունը, ես կասեի՝ միջազգային քաղաքականությունը, աշխարհի ամենաարագ բանը չէ, այսինքն՝ հաճախ կարող է մեկ օր հայտարարություն արվել, և դժվար է դրա վերաբերյալ արձագանք սպասել հաջորդ օրը, բայց, այնուամենայնիվ, մեզ համար խնդիր է, որ Ադրբեջանի կողմից անընդհատ արվող ապակառուցողական և ռազմաշունչ հայտարարությունները չեն արժանանում համապատասխան արձագանքի»: Նա նշեց, որ այդ առումով եթե հայկական կողմը կոնկրետ գործողություն իրականացնի՝ տեղյակ կպահեն:
Նախարարի տեղակալը չհամաձայնեց, որ նախկինում ընդդիմության մեղադրանքները՝ ուղղված իշխանությանը, թե ակտիվ չեն, Մինսկի խմբի առաջ պահանջներ չեն դնում, հիմա վերաբերում են իրենց: «Արտաքին գործերի նախարարությունն աշխատում է բոլոր ուղղություններով, և եթե տեղեկացնելու բան լինի՝ անպայման կասվի: Մեր խնդիրը Ղարաբաղի հարցով այս պահի դրությամբ այս փուլում բանակցությունների դինամիկան և շարունակականությունն ապահովելն է, իսկ ընդհանուր առմամբ Ղարաբաղի հարցով կարող ենք վերհիշել Կառավարության ծրագրում նշվածը, որ Արցախը պետք է որոշիչ ձայն և մասնակցություն ունենա բանակցություններում»,- ասաց նա:
00:00:00
