Ռուս-իսրայելցի բլոգեր Ալեքսանդր Լապշինը, որն Արցախ այցելելու համար հայտնվել էր ադրբեջանական բանտում, ապա ազատ արձակվել, գրառում է կատարել՝ ներկայացնելով ադրբեջանական ԶԼՄ-ների անդրադարձը նրա և ՀՀ նախագահ Արմեն Սարգսյանի հանդիպմանըՎաշինգտոնում: Դիմելով հայ ընկերներին՝ Լապշինը նշել է, որ երկար ժամանակ չէր կարողանում հասկանալ, թե ինչու է Ադրբեջանի պես թշնամի ունենալը վիրավորական: «Ինչո՞ւ է վիրավորական: Հիմա հասկանում եմ: Լինել այսքան կանխատեսելի, անխելք, ձանձրալի, թույլ, ահա այն թշնամին, որի համար ամաչում են իմ հայ ընկերները: Նրանք կարող են կտրել մահացած ծերունու ականջները և չորսով խեղդել Լապշինին բանտախցում և ոչինչ ավելին»,- իր ֆեյսբուքյան էջում գրել է Լապշինը՝ հավելելով, որ Հայաստանի նախագահ Արմեն Սարգսյանի հետ լուսանկարին կից կատակով գրառել էր, որ «հաղթանակած Նավթաստանի (նկատի ունի Ադրբեջանը-tert.am) հետախուզությունը որսացել է Արմեն Սարգսյանի հետ արված լուսանկարը, դա նշանակում է, որ Լապշինը հաստատ փող է ստացել դաշնակներից»: Ինչպես նկատում է բլոգերը, «Ադրբեջանն այնքան ցած է գլորվել, որ հենց նույն խոսքերը հրապարկել է բոլոր պարբերականներում»: «Այս ամբողջ պատմության մեջ ինձ միայն մի բան է զարմացնում. որ նրանք կորցրել են միայն Ղարաբաղը, բայց ինչ-որ հրաշքով պահպանել են Գյանջան (պատմական Գանձակը - tert.am) և Բաքուն: Իրականում, հրաշք է», - հավելել է բլոգերը: