Իսլամական հեղափոխության պահապանների կորպուսի (ԻՀՊԿ) ներկայացուցիչ, բրիգադի գեներալ Մոհսեն Մոհեբբին հայտարարել է, որ Իրանը գործողությունների սցենար է նախապատրաստել ԱՄՆ-ի յուրաքանչյուր քայլի համար՝ սաստկացող տնտեսական պատերազմի պայմաններում, հայտնում է Mehr-ը։
Ըստ գեներալի, ԱՄՆ նախագահի հայտարարությունը Իրանի դեմ «ամենակոշտ տնտեսական պատերազմը» սկսելու մասին փաստացի վկայում է ռազմական ոլորտում Վաշինգտոնի պարտության մասին։
«Եթե դուք հաղթած լինեիք ռազմական դաշտում, ապա ստիպված չէիք լինի սկսել տնտեսական պատերազմ», — հայտարարել է Մոհեբբին։
Նա նշել է, որ ԱՄՆ-ի տնտեսական ճնշումը նոր երևույթ չէ. Ըստ նրա, Վաշինգտոնն արդեն 47 տարի տնտեսական պատերազմ է վարում Իրանի դեմ և պատժամիջոցներ է սահմանել իրանական տնտեսության գրեթե բոլոր ոլորտների նկատմամբ։
ԻՀՊԿ ներկայացուցիչն ընդգծել է, որ Թեհրանն ունի հակազդման ծրագիր ԱՄՆ-ի յուրաքանչյուր թշնամական գործողության համար։ Մասնավորապես, ըստ նրա, Իրանը պատրաստել է միջոցներ՝ տնտեսական ճնշման հետևանքները նվազագույնի հասցնելու և այլ երկրների հետ առևտրային հարաբերությունները պահպանելու համար։
«Մենք ունենք սցենար, որը թույլ է տալիս դիմակայել հակառակորդի տնտեսական պատերազմի բացասական հետևանքներին և առանց դժվարության զարգացնել տնտեսական հարաբերություններն այլ երկրների հետ։ Տնտեսական ոլորտում անհանգստանալու պատճառներ չկան», — ասել է Մոհեբբին։
Նա նաև հայտարարել է, որ Իրանը շարունակում է զարգացնել տնտեսական կապերը նույնիսկ ԱՄՆ-ին անմիջապես հարող տարածքներում՝ շրջանցելով ամերիկյան ազդեցությունը։
«Մենք շրջանցում ենք Ամերիկային, և դուք արդյունքը կտեսնեք մոտ ապագայում», — ավելացրել է ԻՀՊԿ ներկայացուցիչը։
