2026 թվականի աշխարհի առաջնության ավարտին ՖԻՖԱ-ի նախագահ Ջանի Ինֆանտինոն ներկա կլինի մրցաշարի 104 խաղերից գրեթե կեսին, գրում է Bloomberg-ը։ Այդ նպատակով նա մրցաշարի ընթացքում մասնավոր «Gulfstream G650ER» ինքնաթիռով, որը շահագործում է «Qatar Airways»-ը, անցել է մոտ 57,700 մղոն (92,900 կմ)։ Bloomberg-ի հաշվարկներով՝ դա համարժեք է Երկրի հասարակածը գրեթե երկու անգամ շրջանցելուն կամ Լոս Անջելես–Նյու Յորք երթուղով 23 թռիչքի։

Ինֆանտինոն այնքան հաճախ է հայտնվել տարբեր մարզադաշտերում, որ սոցիալական ցանցերում նույնիսկ տարածվել է կատակ, թե նա միաժամանակ երկու խաղի է ներկա եղել։ Իրականում նա 13 անգամ նույն օրը մասնակցել է տարբեր քաղաքներում, երբեմն նաև տարբեր երկրներում անցկացվող երկու հանդիպումների՝ արագ տեղաշարժվելով մասնավոր ինքնաթիռով։

Հունիսի 26-ը նրա ամենածանրաբեռնված օրերից էր։ Նախորդ երեկոյան Ֆիլադելֆիայում դիտելով Կոտ դ'Իվուար–Կյուրասաո հանդիպումը և գիշերելով Մայամիում՝ նա առավոտյան թռել է Դալաս, որտեղ կարճ հանդիպում է անցկացրել Հորդանանի հավաքականի հետ։ Այնուհետև մեկուկես ժամ անց մեկնել է Սիեթլ՝ դիտելու Եգիպտոս–Իրան հանդիպումը, իսկ խաղից հետո նույն օրը վերադարձել է Մայամի, որ հաջորդ օրը ներկա գտնվի Կոլումբիա–Պորտուգալիա խաղին։

Bloomberg-ը նշում է, որ այսպիսի ակտիվ տեղաշարժերը հնարավոր են դարձել մրցաշարի աննախադեպ ձևաչափի պատճառով։ Առաջին անգամ աշխարհի առաջնությունն անցկացվում է երեք երկրում՝ ԱՄՆ-ում, Կանադայում և Մեքսիկայում, իսկ հանդիպումների թիվը 64-ից հասել է 104-ի։ Ինֆանտինոն արդեն հայտարարել է, որ ՖԻՖԱ-ն քննարկում է 2030 թվականի մրցաշարը մինչև 64 հավաքականի ընդլայնելու հնարավորությունը։

Հոդվածում առանձնահատուկ ուշադրություն է դարձվում նաև բնապահպանական հետևանքներին։ Մասնավոր ավիացիայի ոլորտի մասնագետ Բարրի Շևլինի գնահատմամբ՝ Ինֆանտինոյի թռիչքների միայն ավիավառելիքի արժեքը կարող է գերազանցել 350 հազար դոլարը, իսկ արտանետումները՝ 700 տոննա CO₂, ինչը համարժեք է շուրջ 40 միջին ամերիկացու մեկ տարվա ածխածնային հետքին։

Նշվում է նաև, որ Ինֆանտինոյի հայտնվելը մարզադաշտերի մեծ էկրաններին երբեմն ուղեկցվել է հանդիսատեսի սուլոցներով։ Դրա պատճառներից մեկը մրցաշարի ընթացքում ծագած մի շարք վիճահարույց որոշումներն էին, մասնավորապես՝ ՖԻՖԱ-ի կողմից ԱՄՆ-ի հավաքականի ֆուտբոլիստ Ֆոլարին Բալոգանի որակազրկման չեղարկումը՝ այն բանից հետո, երբ ԱՄՆ նախագահ Դոնալդ Թրամփը զանգահարել էր Ինֆանտինոյին և խնդրել վերանայել որոշումը։

Միևնույն ժամանակ Bloomberg-ը նշում է, որ Ինֆանտինոյի հաճախակի ներկայությունը խաղերին նաև քաղաքական նշանակություն ունի։ Աշխարհի առաջնության ընթացքում նա հանդիպում է տասնյակ երկրների ֆուտբոլային ֆեդերացիաների ղեկավարների հետ, որոնք հաջորդ տարվա ՖԻՖԱ-ի կոնգրեսում մասնակցելու են նախագահի ընտրությանը։ Վերլուծաբանների կարծիքով՝ նման ակտիվ շփումները կարող են ամրապնդել Ինֆանտինոյի դիրքերը, քանի որ նա պատրաստվում է առաջադրվել չորրորդ ժամկետի համար։