Ուրբաթ Ֆլորիդայի Ֆորտ Մայերս Բիչ լողափում մի տղամարդ մահացել է, նրա ընտանիքի երեք անդամներ վնասվածքներ են ստացել կայծակի հարվածի հետևանքով, հայտնել է NBC News-ը։

Ֆորտ Մայերս Բիչ օկրուգի հրշեջ ծառայության տվյալներով՝ փրկարարական ստորաբաժանումները դեպքի վայր են ուղարկվել այն բանից հետո, երբ հաղորդում էր ստացվել, որ մի քանի մարդ խոցվել է կայծակից։

Երբ փրկարարները ժամանել են, տուժածներից մեկն անգիտակից վիճակում էր։ Եվս երեք հոգի տեղափոխվել է հիվանդանոցներ։ Լի օկրուգի շերիֆի գրասենյակի հաղորդմամբ՝ հարվածի պահին բոլոր չորս մարդիկ ջրի մեջ են եղել։

Ականատեսները, մինչև արտակարգ ծառայությունների ժամանումը, կիրառել են ավտոմատ արտաքին դեֆիբրիլյատոր և սկսել սիրտ-թոքային վերակենդանացում, սակայն տուժածին փրկել չի հաջողվել։

Հրշեջ ծառայությունը բնակիչներին և զբոսաշրջիկներին կոչ է արել ուշադիր հետևել եղանակին և ամպրոպի առաջին նշանների դեպքում անմիջապես դուրս գալ ջրից ու պատսպարվել շենքերում։

Ավելի ուշ Լի օկրուգի շերիֆի գրասենյակը հայտնել է, որ մահացածը 51-ամյա Վիկտոր Կիրիկն էր։ Երեք տուժածները՝ նրա ընտանիքի անդամները, գտնվում են կայուն վիճակում։

Ֆորտ Մայերս Բիչ քաղաքի իշխանությունները ցավակցություն են հայտնել մահացածի ընտանիքին և հորդորել զգուշություն պահպանել ամառային ամպրոպների շրջանում, որոնք կարող են սրընթաց զարգանալ։