Սամվել Կարապետյանի ազատությունն ահաբեկում է իշխանությանը, ընդգծում է սահմանադրագետ, «Մեր ձևով» շարժման անդամ Գոհար Մելոյանը։
«Երեկ՝ հունվարի 16-ին ՀՀ երկու առանձին դատական ատյաններում քննվում էին ազգային բարերար Սամվել Կարապետյանի նկատմամբ խափանման միջոց կիրառելու հարցեր։
Առաջինը վերաքննիչ բողոք էր դեկտեմբերի 30-ի որոշման դեմ՝ տնային կալանքը կրկին կալանքով փոխարինելու պահանջով։
Երկրորդը տնային կալանքը երկարաձգելու միջնորդություն էր, որը նիստի սկզբին փոխվեց կալանքի միջնորդության, ինչի իրավունքը չունեին։
Առաջինի արդյունքում, ժամը 14-ի սահմաններում հայտնի դարձավ, որ տնային կալանքը վերացվում է և կրկին կալանք պետք է կիրառվի։
Զուգահեռ՝ իրավապահները, քաջատեղյակ լինելով, որ ժամը 16:00-ին սկսվում է կալանքի միջնորդության քննությունը, ընդհատում են այդ պահին հիվանդանոցում բժիշկների վերահսկողության տակ գտնվող Սանվել Կարապետյանի բուժումը, հիվանդանոցից քրեակատարողական հիմնարկ են ուղեկցում Քովիդի դեպքում, երբ, ըստ կարգի, վերջինս պետք է մեկուսացված մնար։
Մոտ 14 ժամ ընթացավ 2-րդ նիստը, ու կրկին Սամվել Կարապետյան նկատմամբ կիրառվեց տնային կալանքը՝ որպես խափանման միջոց։
Սխեմատիկ ոտնահարվում են մարդու հիմնարար իրավունքները, հրահանգավորվում են իրավապահները և փորձում են ամեն գնով մեկուսացնել մեծանուն բարերարին։
Բայց անգամ մեկուսացման պայմաններում, կռիվ են տալիս Սամվել Կարապետյանի ազատության հետևանքների հետ։
Շուրջ 7 ամիս տևած այս քննության միակ նպատակը Կարապետյանին անազատության մեջ պահելն ու նրա քաղաքական-հասարակական գործունեությանը խոչընդոտելն է։
Կարապետյանը հաղթահարելու է այս ժամանակավոր խոչընդոտները և առաջնորդելու է ուժեղ Հայաստան, որտեղ չեն ոտնահարվում մեր ազգային արժեքները, դատական ակտերն էլ զանգերով, SMS-ներով կամ խմբագրական հոդվածներով չեն կայացվում, իսկ իրավապահ մարմիններին կաշկանդում է միայն իրենց խիղճն ու օրենքը»,- սոցցանցի իր էջում գրել է Մելոյանը։
