Նիկոլ Փաշինյանի՝ այսօրվա հրավիրած ուխտերթով պայմանավորված, որը մեկնարկելու է Գրիգոր Լուսավորիչ եկեղեցու մոտից, վաղ առավոտից ոստիկանները իրականացրել են տարհանման աշխատանքներ: Մասնավորապես Irakanum.am-ին ահազանգած քաղաքացիները հայտնեցին, որ առավոտյան պարզել են, որ իրենց մեքենաները «գողացել» են: Ամբողջ Սայաթ- Նովա և Ալեք Մանուկյան փողոցներում կանգառած ավտոմեքենաները պարեկայինի աշխատողները հեռացրել են: «Իմ մեքենան օրինական վայրում կանգնած է եղել, առավոտյան սակայն արդեն չկար: Հիմա ես շտապ պետք է ծնողիս հիվանդանոց տեղափոխեմ, բայց իմ մեքենան տեղում չէ: Ինչ-որ զանգ էր եկել, որին չեմ պատասխանել, հետո նույն համարով հետ եմ զանգել, պարզվում է պարեկայինի աշխատողի համար է, ով ասում է, թե ավտոմեքենադ տեղափոխել ենք այլ վայր»,- մեզ հետ զրույցում ասաց քաղաքացին: Վերջինիս հարևանի մեքենան նույնպես նույն մեխանիզմով «անհետացել» է: «Այսինքն, որ Փաշինյանը որոշել է քայլել, մենք պետք է կրենք վնասներ, այդ թվում և ժամանակի, ինչ օրենքով են առանց զգուշացնելու իմ գույքը օրինական վայրից հեռացրել, ով է իրենց այդ իրավունքը տվել»,- մեր միջոցով իրավապահներին է հարցադրում անում քաղաքացին: Ավելի ուշ վարորդներից շատերը պարզել են, որ իրենց ավտոմեքենաները տեղափոխել են «Տաշիր» առևտրի կենտրոնի հարակից տարածք:
Ստացվում է, որպեսզի Փաշինյանը «տիրադավ» անունը ստացած հոգևորականների ու իր թիմակիցների հետ քայլերթ իրականացնի, ՀՀ հպարտ քաղաքացիները պետք է նեղություն կրեն, իսկ սա այն պարագայում, որ նույն այդ քաղաքացիներին Փաշինյանը քիչ է, որ շատ է սիրում (գոնե ամենօրյա սրտիկները ուղարկված դա են ցույց տալիս), մի բան էլ հպարտանում է, ու նրանց ևս համարում է վարչապետ: Բայց այս ամենը մինչ այն պահը, երբ ինքը որոշում է տեղաշարժվել երկրով, ու այս պարագայում բնավ էլ կարևոր չէ, այդ շարժը ոտքով է իրականացնում, թե տասնյակ մեքենաների ուղեկցությամբ:
Irakanum.am-ը կատարվածի վերաբերյալ փորձեց պարզաբանում ստանալ ՆԳ նախարարությունից: ՆԳՆ խոսնակ Նարեկ Սարգսյանը ի պատասխան մեր հարցի, թե ինչով է պայմանավորված, որ քաղաքացիների մեքենաները հեռացրել են օրինական կանգառած վայրից ասաց. «Հասարակական կարգի պահպանության միջոցառումների շրջանակում կապ է հաստատվել կայանված մեքենաների վարորդների հետ, որոնք տեղափոխել են իրենց տրանսպորտային միջոցները։ Որոշ մեքենաներ էլ տարհանվել են։ Վարչական իրավախախտման վերաբերյալ արձանագրություններ չեն կազմվել»։
Irakanum.am
