Բարձր ենք գնահատում Ֆրանսիայի աջակցությունը՝ Հայաստանի Հանրապետության ինքնիշխանության, տարածքային ամբողջականության և ժողովրդավարության հետագա ամրապնդմանը․ Գորիս քաղաքում անցկացվող Հայաստան-Ֆրանսիա ապակենտրոնացված համագործակցության 5-րդ համաժողովին հայտարարեց ԱԳ փոխնախարար Վահան Կոստանյանը։
«Բարձր ենք գնահատում նաև երկկողմ և եվրոպական ձևաչափով ցուցաբերվող Ֆրանսիայի օժանդակությունը ՀՀ պաշտպանական կարողություններին և ՀՀ տնտեսական դիմակայունության ամրապնդմանը, ինչպես նաև աջակցությունը՝ ՀՀ-ԵՄ գործընկերության ընդլայնմանը, Եվրոպային առավել մոտենալու մեր ցանկություններին»,-ասաց նա։
Փոխնախարարը բնական և սպասելի է համարում Գորիսում Ֆրանսիայի ներկայությունը. «Հստակ քաղաքական կամքի մասին է խոսում այսօր Գորիսում կայանալիք Ֆրանսիայի պատվավոր հյուպատոսի գրասենյակի բացումը»։
Կոստանյանը շեշտեց, որ Սյունքը կարող է դառնալ համագործակցության ռազմավարական հենակետ. «Որտեղ ենթակառուցվածքների, տրանսպորտի, էներգետիկ ոլորտներում համատեղ ծրագրերը կծառայեն ոչ միայն ՀՀ-ի, այլ նաև ողջ տարածաշրջանի, նաև լայն տարածաշրջանի շահերին։ Մեր նպատակն է ձևավորել խաղաղ և անվտանգ տարածաշրջան, որտեղ հակամարտությունների փոխարեն կգերակայի համագործակցությունը, փակ սահամանների փոխարեն՝ դարպասները, սպառնալիքների փոխարեն՝ փոխադարձ հարգանքի վրա կզարգանան միջպետական հարաբերությունները։ Սա է առաջ շարժվելու մեր տեսլականը, և այս միջոցառումը Սյունքիում դրա վառ վկայությունն է»,-ասաց նա։
