Դոնալդ Թրամփի վարչակազմի համար ուկրաինական և իրանական ուղղությունը կարևոր են լինելու, և անհայտ է, որ կարևոր են լինելու նաև մեզ համար, որովհետև մեզ վրա անուղղակիորեն ազդեցություն ունենալու է։ Այս մասին «Վրաստանի, ԱՄՆ-ի ընտրությունների, ուկրաինական հակամարտության ազդեցությունը ՀՀ անվտանգության վրա» քննարկմանն ասաց քաղաքագետ Սուրեն Սարգսյանը։
«Ամենավատ սցենարը կարող է լինել այն, որ Ռուսաստանի հետ հարաբերությունների կարգավորում տեղի չունենա, մյուս կողմից ուժեղ ճնշում սկսեն կիրառել Իրանի նկատմամբ, այդ թվում՝ մեր նկատմամբ։ Ենթադրենք, ասեն՝ գիտեք, պետք է Իրանի հետ առևտրաշրջանառությունը կրճատեք, սա կարող է մեր տնտեսության համար կործանարար լինել, սա ամենավատ սցենարն է։ Այս ամենավատ սցենարից մի քիչ լավ սցենարը կլինի այն, որ Թրամփը սկսի Իրանի և Իսրայելի հետ ընդհանուր եզրեր գտնել, ինչը քիչ հավանական է։ Այս սցենարը կարող է գոյություն ունենալ հաշվի առնելով իր՝ խաղաղություն բերելու խոստումները։ Ի դեպ, ինքը նաև այս առումով մրցակցության մեջ է Օբամայի հետ, որովհետև անհատականությունն իր համար շատ կարևոր է, ուզում է նաև Նոբելյան մրցանակի արժանանալ, ինչպես Օբաման է արժանացել»,- նշեց քաղաքագետը։
Անդրադառնալով հայ–ադրբեջանական հարաբերություններին, որոնց միջնորդը ԱՄՆ–ն է, Սուրեն Սարգսյանն ասաց. «Վերջերս Բայդենը նամակ էր ուղարկել երկու առաջնորդներին, կոչ անելով մինչև տարեվերջ ստորագրել համաձայնագիրը։ Ադրբեջանը դեռևս չի պատասխանել։ Ինչո՞ւ էր Բայդենն ուզում, որ հիմա ստորագրեին, որպեսի դափնիներն իրեն վերցներ։ Թրամփը չի ասելու՝ եկեք, ստորագրեք, շնորհակալություն հայտնենք Բայդենին, նա փորձելու է պրոցեսը ձգձգել այնքան մինչև ինքն ունենա իր ներդրումը բանակցային պրոցեսում, որ դափնիները վերցնի իր վրա»։
Քաղաքագետի խոսքով՝ Թրամփի գալու պարագայում սցենարները շատ են, հաշվի առնելով նաև այն, որ Թրամփի նման գործիչն ինքնին անկախատեսելի է. «Կարծում եմ՝ երբ նա սկսի ավելի ակտիվ խոսել իր արտաքին քաղաքական պատկերացումների մասին, մենք էլ որոշ պատկերացումներ կկազմենք, թե ինչ է տեղի ունենալու աշխարհի և Հարավային Կովկասի հետ»։
