Եվրահանձնաժողովը շուտով կներկայացնի Ռուսաստանի դեմ ԵՄ պատժամիջոցների 12-րդ փաթեթը՝ ներմուծման և արտահանման նոր արգելքներով և նավթի գնի առաստաղի խստացմամբ, հայտարարել է ԵՀ ղեկավար Ուրսուլա ֆոն դեր Լեյենը։
«Շուտով մենք կներկայացնենք պատժամիջոցների 12-րդ փաթեթը։ Ցանկում նոր լրացումներով։ Ներմուծման և արտահանման նոր արգելքներ։ Նավթի գնի առաստաղը խստացնելու գործողություններ»,- X սոցիալական ցանցում գրել է ԵՀ ղեկավարը։
Ավելի վաղ, Politico թերթը, վկայակոչելով ԵՄ դիվանագետներին, հայտնել էր, որ սպասվում է, որ Եվրահանձնաժողովը հաջորդ շաբաթ կներկայացնի Ռուսաստանի Դաշնության դեմ պատժամիջոցների 12-րդ փաթեթի վերաբերյալ իր առաջարկները, քննարկումները կարող են տևել մինչև տարեվերջ։
Bloomberg-ն ավելի վաղ հայտնել էր, որ Ռուսաստանի դեմ ԵՄ նոր պատժամիջոցները, ըստ առաջարկների, կարող են ներառել քիմիական նյութեր, ռազմական նպատակներով օգտագործվող տեխնոլոգիաներ, մշակված մետաղներ, ալյումինե արտադրանք, շինարարական և տրանսպորտային արտադրանք, եռակցման մեքենաներ և ծրագրային ապահովման լիցենզիաներ: Բացի այդ, քննարկվում է ցուցակում ներառել ռուսական ադամանդի ներկրման արգելք, նշել է գործակալությունը։ Գործակալությունը հայտնել է, որ եվրոպական պատժամիջոցների 12-րդ փաթեթը կներառի նաև միջոցներ երրորդ երկրների միջոցով պատժամիջոցները շրջանցելու ենթադրյալ փորձերի դեմ։ ԵՄ-ն կփորձի արդեն ձեռնարկված միջոցառումներին ավելացնել ավելի շատ ապրանքներ և ընկերություններ երրորդ երկրներում։
