Իսրայելի ռմբակոծության հետևանքով Գազայի հատվածում զոհված պաղեստինցիների թիվը գերազանցել է 2,3 հազարը, ավելի քան 9,7 հազարը վիրավորվել են։ Այս մասին հայտնում է Reuters-ը՝ հղում անելով առողջապահության նախարարությանը։
Ավելի վաղ հաղորդվում էր 2,2 հազար զոհի և 8,7 հազար վիրավորի մասին։
«Միայն Գազայի հատվածում պաղեստինցիների զոհերի թիվը հասել է 2329-ի, 9714-ը վիրավորվել են»,- ասված է զեկույցում:
Հիշեցնենք, որ հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 000 հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։
Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին:
