Ռուս խաղաղապահների անձնուրաց եւ պրոֆեսիոնալ գործողություններն օգնել են խուսափել ավելի մեծ թվով զոհերից Արցախում հակամարտության էսկալացիայի ընթացքում։ Այս մասին հայտարարել է ՌԴ պաշտպանության նախարար Սերգեյ Շոյգուն, տեղեկացրել է ՏԱՍՍ-ը։
«Շնորհակալություն եմ հայտնում մեր տղաներին՝ ռուս խաղաղապահներին, անձնազոհ եւ պրոֆեսիոնալ գործողությունների համար, որոնք օգնել են խուսափել ավելի մեծ թվով զոհերից։ Խաղաղապահների ուժերով տուժածներին եւ կարիքավորներին ցուցաբերվել է համակողմանի բուժօգնություն»,- ասել է նա ՌԴ Զինված ուժերի ղեկավարների հետ սելեկտորային խորհրդակցության շրջանակում։
Շոյգուի խոսքով՝ ռուսական խաղաղապահ զորակազմի աջակցությամբ ստեղծվել է բլոկային մոդուլային քաղաք արդիական սարքավորումներով, ավտովիրակապարան՝ վիրաբուժական օգնության հնարավորությամբ, ինչպես նաեւ վիրաբուժական մոդուլ՝ ինտենսիվ թերապիայի հիվանդասենյակով։ «Հատուկ բժշկական ջոկատի կազմի մեջ են մտել տարբեր մասնագիտությունների տեր բժիշկներ»,- ընդգծել է ՌԴ պաշտպանության նախարարը։
Շոյգուն տեղեկացրել է, որ Արցախի ավելի քան 98 հազար խաղաղ բնակիչներ, ներառյալ 32 հազար երեխաներ, տարհանվել են Հայաստանի տարածք ռուսական խաղաղապահ զորակազմի աջակցությամբ։
