Վենեսուելայի նախագահ Նիկոլաս Մադուրոն մեղադրել է ԱՄՆ նախկին նախագահ Դոնալդ Թրամփին հինգ տարի առաջ իր դեմ մահափորձ կազմակերպելու մեջ, տեղեկացրել է ՏԱՍՍ-ը։
«Մի քանի տարի անց հայտնի է դարձել (ԱՄՆ) նախկին նախագահ Դոնալդ Թրամփի անհատական եւ ուղիղ պատասխանատվության, Սպիտակ տան եւ Դոնալդ Թրամփի կառավարության պատասխանատվության մասին, որոնք հրամայել են Կոլումբիայի նախագահին կազմակերպել մահափորձ»,- ուրբաթ՝ Վենեսուելայի ազգային գվարդիայի 86-ամյակի տոնակատարության ժամանակ ,հայտարարել է Մադուրոն։ Նրա խոսքով՝ Կոլումբիայի նախկին նախագահ Խուան Մանուել Սանթոսը «իշխանությունում գտնվելու վերջին օրերին ֆինանսավորել է ահաբեկչական խմբի պատրաստումը եւ մահափորձից մի քանի օր առաջ հայտարարել, որ շատ շուտով Վենեսուելայում տեղի կունենան կոլապս եւ իշխանափոխություն»։
Մադուրոն նշել է, որ «պետության ղեկավարի դեմ մահափորձը՝ դրոնների օգտագործմամբ, առաջինն է պատմության մեջ»։ Նա հիշեցրել է, որ սկսված հետաքննությունը հանգեցրել է «ահաբեկչություն կատարողների անհապաղ ձերբակալությանը, որոնք խոստովանել են իրենց մեղքը» եւ դատապարտվել բանտարկության։ Ինչպես ասել է նախագահը, պարզվել է, որ մահափորձի կազմակերպիչներից մեկը Կոլումբիայում «թաքնվող» Վենեսուելայի խորհրդարանի նախկին պատգամավոր Խուլիո Բորխեսն էր»։
Մադուրոյի դեմ մահափորձը անօդաչուների օգտագործմամբ, որոնք պայթուցիկներով էին լիցքավորված, տեղի է ունեցել Կարակասում 2018թ. օգոստոսի 4-ի ելույթի ժամանակ։ Թռչող սարքերը շարքից հանվել են, ընդ որում՝ ուժային կառույցների յոթ աշխատակիցներ վիրավորվել են։ Մադուրոն եւ երկրի բարձրագույն ղեկավարության անդամները չեն տուժել։
