Եվրամիության խորհուրդն ընդլայնել է ռուսական բիզնեսի դեմ պատժամիջոցների կիրառման չափորոշիչները՝ Ռուսաստանի տնտեսության եկամտաբեր ոլորտներում աշխատանքը նման չափանիշ դարձնելով։ Համապատասխան փոփոխություն է կատարվել Խորհրդի 2023 թվականի հունիսի 5-ի 2023/1089 կանոնակարգում, որը փոփոխում է թիվ 269/2014 կանոնակարգը (ԵՄ) «Ուկրաինայի տարածքային ամբողջականությունը, ինքնիշխանությունը և անկախությունը խախտող կամ սպառնացող գործողությունների դեմ սահմանափակող միջոցների մասին»։

Բացի այդ, ուղղումը թույլ կտա ԵՄ-ին պատժամիջոցներ կիրառել ռուս խոշոր գործարարների հարազատների նկատմամբ:

Մինչ այդ փոփոխությունը, 2022 թվականի փետրվարից, ԵՄ-ն կարող էր պատժամիջոցային ցուցակներում ավելացնել կազմակերպություններ և անհատներ, եթե նրանք «առաջատար ձեռնարկատերեր, իրավաբանական անձինք, կառույցներ կամ կազմակերպություններ են, որոնք ներգրավված են տնտեսության ոլորտներում, որոնք եկամուտի զգալի աղբյուր են ապահովում Ռուսաստանի Դաշնության կառավարությանը»։