«Դիմադրության» շարժման մասնակիցները երթով շարժվեցին Ֆրանսիայի հրապարակ: Մինչ այդ նրանք այցելել էին ԱԳՆ շենք, ԵՊՀ եւ Տնտեսագիտական համալսարան, որպեսզի պարզեն նախարարների եւ ռեկտորների վերաբերմունքը Արցախի հարցում:

Ոչ նախարարները, որ ռեկտորները չհանդիպեցին ընդդիմադիր պատգամավորների հետ: ԵՊՀ ռեկտորի պաշտոնակատարը, ըստ պատգամավորների, փակվել էր իր աշխատասենյակում այնքան ժամանակ, մինչեւ ընդդիմադիր պատգամավորները կհեռանան ԵՊՀ-ից:

Տնտեսագիտական համալսարանի ռեկտորը տեղում չի եղել:

ԱԺ փոխխոսնակ Իշխան Սաղաթելյանը հայտարարեց, որ այդտեղից շարժվում են Ֆրանսիայի հրապարակ, իսկ ժամը 19-ին տեղի կունենա հանհահավաք Ֆրանսիայի հրապարակում:

Հիշեցնենք, որ ընդդիմության պատրաստած հայտարարության տեքստում նշվում է. «Հայաստանն աջակցելու է Արցախի ժողովրդի ինքնորոշման իրավունքի լիարժեք իրացմանը: Արցախը երբեք չի լինելու Ադրբեջանի կազմում:

Հայաստանի Հանրապետության և Արցախի Հանրապետության միջև պետք է լինի հուսալի ցամաքային կապ․ Արցախն անկլավ չի լինելու: Հայաստանի Հանրապետությունն Արցախի ժողովրդի անվտանգության և ինքնորոշման իրավունքի իրացման երաշխավորն է:

Սահմանագծման և սահմանազատման աշխատանքները պետք է իրականացվեն ՀՀ ինքնիշխան տարածքից Ադրբեջանի զորքերի դուրս բերման նախապայմանով: Սահմանագծման և սահմանազատման աշխատանքների արդյունքում բացառվում է Հայաստանի Հանրապետության ամբողջականության խաթարումը:

Հայ-թուրքական հարաբերությունների կարգավորման գործընթացում բացառվում է որևէ համաձայնություն, որը հարցականի տակ կդնի Հայոց ցեղասպանությունը:

Ադրբեջանի և Թուրքիայի հետ ճանապարհների ապաշրջափակումը չի կարող տեղի ունենալ միջանցքային տրամաբանությամբ»։