Կառավարության այսօրվա նիստը վարչապետ Նիկոլ Փաշինյանը սկսեց՝ կրկին ուսուցիչների աշխատավարձերի մասին խոսելով:
«Ուսուցիչների աշխատավարձի բարձրացումը միշտ եղել է մեր օրակարգում», - ասաց նա:
«Մտածում էինք, որ ոչ թե մենք որոշենք՝ ինչքան է ուցուցչի աշխատավարձը, այլ՝ ուսուցիչն ինքը որոշի ու, ի վերջո, պլանավորեցինք ու 2021 թվականի գարնանից սկսեցինք բարեփոխումը և ուսուցիչներին հնարավորություն տվեցինք, որ նրանք կամավոր կամքով ատեստավորվեն», - ասաց նա:
Վարչապետը նշեց, թե նախորդ տարի ատեստավորում անցած ուսուցիչների աշխատավարձը մայիսի 1-ից կբարձրանա:
Նախագծի համաձայն՝ ատեստավորումն անցկացվում է յուրաքանչյուր տարի, առնվազն մեկ անգամ:
Ատեստավորումն անցկացվում է նախապես կազմված ժամանակացույցին համապատասխան։ 2022 թվականին ատեստավորումն իրականացվում է 5-12-րդ դասարաններում բոլոր առարկաները դասավանդող ուսուցիչների համար: 2023 թվականից սկսած՝ ատեստավորումն անցկացվելու է 1-12-րդ դասարաններում դասավանդող բոլոր ուսուցիչների համար։
Հավելավճար տրվում է միայն հանրակրթական ուսումնական հաստատությունում աշխատող ուսուցչին:
Ատեստավորման արդյունքում 90-100 տոկոս արդյունք ցուցաբերած ուսուցիչները համարվում են ատեստավորված․ հավելավճար տրվում է աշխատավարձի 50 տոկոսի չափով: Եթե ատեստավորված ուսուցիչը հավաքում է 59 տոկոսից ցածր միավոր, ապա հաջորդ մեկ տարվա ընթացքում պետք է վերաատեստավորվի։
Ապա Փաշինյանը խոսեց դպրոց տանող ճանապարհների մասին՝ նշելով, թե պետք է երեխաները «դարուփոս» ճանապարհով դպրոց չգնան:
«Սա մեր ամենակարևոր բարեփոխումներից մեկն է, առաջիկայում շատ բարդ քննարկումներ ենք ունենալու», - ասաց նա:
Էկոնոմիկայի նախարար Վահան Քերոբյանը հետաքրքրվեց՝ կա՞ն ուսուցիչներ, որ մայիսի 1-ից 400 հազար դրամ աշխատավարձ կստանան, ԿԳՄՍ նախարար Վահրամ Դումանյանն էլ ասաց, թե չեն կարող լինել, քանի որ նոր են որոշումը կայացնում:
«Այս պահին չկան, բայց կլինեն», - ասաց նախարարը:
