Ռուսաստանի և Հայաստանի կառավարությունները համաձայնագիր են ստորագրել տեղեկատվական անվտանգության ոլորտում համագործակցության մասին։ Այս մասին երեքշաբթի հայտնել է ՌԴ Անվտանգության խորհրդի ապարատի մամուլի ծառայությունը, գրում է ՏԱՍՍ-ը։
«Փաստաթղթի համաձայն՝ տեղեկատվական անվտանգության ոլորտում Ռուսաստանի և Հայաստանի համագործակցության հիմնական ուղղությունները, մասնավորապես, լինելու են այդ ոլորտում սպառնալիքներին հակազդելու համակարգումը, տվյալների փոխանակումը բացահայտելու, կանխելու, ճնշելու և հետաքննելու նպատակով, ահաբեկչական և այլ հանցավոր նպատակներով տեղեկատվական և հեռահաղորդակցական տեխնոլոգիաների օգտագործման հետ կապված հանցագործություններ»,- ասված է հաղորդագրությունում։
Ռուսաստանի Դաշնության և Հայաստանի Հանրապետության անունից համաձայնագիրը ստորագրել են երկու երկրների անվտանգության խորհուրդների քարտուղարներ Նիկոլայ Պատրուշևը և Արմեն Գրիգորյանը, նշել են նախարարությունից։
Հայաստանի վարչապետ Նիկոլ Փաշինյանը երկօրյա պաշտոնական այցով գտնվում է Ռուսաստանում։ Նրա հետ Մոսկվա են ժամանել փոխվարչապետ Մհեր Գրիգորյանը, Անվտանգության խորհրդի քարտուղար Գրիգորյանը, ԱԳ նախարար Արարատ Միրզոյանը, կրթության, գիտության, սպորտի և մշակույթի նախարար Վահրամ Դումանյանը, պաշտոնատար այլ անձինք։
