Չորս տարի առաջ ինչ-որ մեկը «դուխով» գլխարկ հագցրեց մեր գլխներին և ասաց՝ դուք հպարտ եք, դուխով։ Այսօր այս գլխարկը հայտնվել է գետնին, հիշեցնում է մուրացկանի պարկ։ Այդ «դուխով», հպարտ տղան իր գլխարկը հագցնելով շատերի գլխին՝ այսօր ընդամենը խաղաղություն է մուրում։ Այս մասին ֆեյսբուքյան ուղիղ եթերում ասաց գյումրեցի իրավապաշտպան Կարապետ Պողոսյանը։
«Խաղաղություն երբեք հնարավոր չէ մուրալ, խաղաղություն հնարավոր է միայն պարտադրել։ Ավելին՝ այդ խաղաղությունն ինքը չի մուրում հայ ժողովրդի համար, բացառությամբ՝ իր և իր ընտանիքի կյանքի և առողջության համար, իր թալանը վայելելու համար»,- նշեց նա՝ հավելելով, որ բոլորս էլ հասկանում ենք. որ և՛ Ադրբեջանը, և՛ Թուրքիան ցանկություն չունեն մեզ հետ խաղաղություն ունենալու, տեսնում ենք Ադրբեջանի նախագահի ամբարտավան պահվածքը, իսկ այս մարդը մեզ պարզապես ցանկանում է դարձնել մուրացկան։
«Այսօր ստիպում է այդ գլխարկը հանել և մուրալ՝ այսօր խաղաղություն, վաղը՝ կյանք, հաջորդ օրը՝ սնունդ։ Այդ հպարտությունն ինքը տարավ միայն մեկ գործողության համար՝ մարդկանց մուրացկան դարձնելու։ Ես պատրաստ չեմ լինել մուրացկան»,- նշեց Պողոսյանը։
